Юртимизда хизматлар соҳасининг иқтисодиётдаги улушини кўпайтириш, жойларда мавжуд имкониятларни тўлиқ ишга солиш, турларини кенгайтириш ва сифатини ошириш, энг муҳими, ушбу тизимни мухим драйверга айлантириш мақсадида қатор қонун ва қарорлар қабул қилинмоқда. Ушбу мавзу юзасидан Иқтисодий тараққиёт ва камбағалликни қисқартириш вазирлиги ва «Ўзбекистон Республикаси Ташқи иқтисодий фаолият миллий банки» АЖ раҳбарияти ҳамда мутасаддилари иштирокида матбуот анжумани бўлиб ўтди.

Таъкидлаш керакки, мамлакатимизда хизматлар кўрсатиш соҳасининг ривожи ҳамда иқтисодий ўсишдаги улушини ошириш учун кенг кўламли ишлар амалга оширилмоқда. Ўзбекистон Республикаси Президентининг 2021 йил 11 майдаги «Хизматлар соҳасини жадал ривожлантириш чора-тадбирлари тўғрисида» ги қарори, мазкур соҳа ривожи учун туртки бўлди.

Мазкур Қарорда «Ўзбекистон Республикаси Ташқи иқтисодий фаолият миллий банки» акциядорлик жамиятига ҳам қатор вазифалар юклатилган бўлиб, йил якунига кўра эришилган натижалар қуйидагиларни ташкил этади.

- Ўзбекистон Республикаси Ялпи ички маҳсулоти III чорак якуни билан 520 трлн.сўмни ташкил этган бўлса, шундан хизмат кўрсатиш хажми 187 трлн.сўм (36%), 2021 йил 1 декабр ҳолатига кўра эса 257,3 трлн.сўмни ташкил этади.
- Хизматлар хажми ўтган йилнинг шу даврига нисбатан 119,8 %га ўсиб, аҳоли жон бошига 7,4 млн.сўмга етган.
- Ушбу соҳада фаолият юритаётган корхона ва ташкилотлар улуши 65,4%ни, кичик тадбиркорлик субъектлари улуши эса 51,6%ни ташкил этади.

Хизматлар соҳасини ривожлантириш бўйича 2022 йилда хизматлар соҳасида қўйидаги ишлар 3 йўналишда амалга ошириш белгиланган бўлиб, унга кўра;

- Биринчи йўналишда 158 та қишлоқ туманларининг ихтисослашувидан келиб чиқиб хизмат соҳасини ривожлантириш (1 трлн.сўм ва 300 минг иш ўрни яратиш), 45 та туристик объектлари мавжуд ҳамда 40 та тоғли ва тоғ олди туманда «тайёр лойиҳа» асосида туризмни ривожлантириш (инфратузилмани яхшилашга 100 млн.долл), 115 та қишлоқ хўжалигида даромад юқори бўлган туманларда замонавий агрохизматларни ривожлантириш, 27 та саноати ривожланган туманда савдо, умумий овқатланиш, логистика, меҳмонхона, техник хизмат кўрсатиш ва кўнгилочар масканлар хизматига устиворлик бериш (хизмат кўрсатиш лойиҳаларига 200 млрд.сўм), 100 та халқаро автомагистрал ва темир йўллари ўтган ҳамда 25 та чега олдида жойлашган туманларни савдо ва логистика хизматлари кўрсатишга ихтисослаштириш (200 млрд.сўм ва 50 минг иш ўрни яратиш) каби вазифалар ижроси илгари сурилган.
- Иккинчи йўналишда эса, 29 та ўрта ва йирик шаҳарлар ва 6 та (аҳолиси 300 мингдан юқори) туманда замонавий бозор хизматларини ривожлантириш (200 млн.долл. ва 200 минг иш ўрни яратиш) кўзда тутилган бўлиб, бунда хизматлар сохасини ривожлантириш учун 10 та тижорат банклари масъул этиб бириктирилган.
- Учинчи йўналиш эса, Тошкент, Самарқанд ва Наманган шаҳарларида юқори даромадли хизматларни ривожлантириш (750 минг иш ўрни яратиш), таълим ва тиббиёт муассасалари жойлашган ҳудудларда бошқа хизматларни ҳамда йирик, замонавий савдо ва кўнгилочар масканларни ривожлантириш, “ТАХ FREE” тизимини жорий этиш, шаҳар ичида “DUTY FREE” дўконларини ташкил этиш орқали савдо ҳажмини 2-3 баробарга ошириш, Наманган шаҳрида 3 та, Самарқанд шаҳрида 7 та йирик кўнгилочар савдо марказларини ташкил этиш сингари вазифаларни ўз ичига олган.

Юқоридаги 3 та йўналиш бўйича 2022 йилда савдо ва хизмат кўрсатиш соҳасида жами 1,5 млн. иш ўрни яратиш топшириғи берилган.