Қўшма Штатлар ўзининг Иордания ва Сурия чегараси яқинидаги ҳарбий базасига учувчисиз ҳаво ҳужуми Эрон томонидан қўллаб-қувватланган жангарилар томонидан амалга оширилган деб ҳисоблайди, шунинг учун Теҳрон кучлари ёки объектларига қарши жавоб ҳужумлари кўриб чиқилмоқда. Бу ҳақда Politico нашри маълум қилди.

Таклиф этилаётган режалар президент Жо Байденнинг тасдиғидан ўтиши керак, деди нашрнинг манбалари. Ҳужум  у розилигини берганидан сўнг бошланади ва бир нечта нишонларга зарбалар берилади.

Марказий разведка бошқармаси ва Пентагон штабининг собиқ раҳбари Жереми Баш Politico нашрига берган интервьюсида аввалги барча чеклаш чоралари Теҳронга етарлича таъсир кўрсатмаганини, шунинг учун «эскалация муқаррар» эканини таъкидлаган.

Нашрнинг яна бир суҳбатдоши, АҚШнинг Яқин Шарқ бўйича тинчлик музокараларининг собиқ иштирокчиси Аарон Девид Миллернинг айтишича, АҚШнинг жавоби «ҳақиқий минтақавий урушни қўзғатиш» хавфини туғдиради.

«Улар Эроннинг Қўшма Штатлар билан тўғридан-тўғри тўқнашувга қодир эмаслигини билишади, аммо бу Ҳизбуллоҳни Исроил ёки Америка активларига бутунлай қарши қўйиши мумкин ва бу вазият кескинлашишига олиб келиши мумкин», –  дея огоҳлантирди у.

28 январь куни АҚШ Марказий қўмондонлиги Иордания шимоли-шарқида, Сурия билан чегара яқинидаги Tower 22 базасига номаълум дрон томонидан ҳужум қилингани ҳақида хабар берди. Оқибатда уч нафар ҳарбий хизматчи ҳалок бўлди, 25 нафари яраланди. Кейинчалик жабрланганлар сони 34 нафарга етди.

Байденнинг айтишича, ҳужум «Сурия ва Ироқда фаолият юритаётган, Эрон томонидан қўллаб-қувватланган радикал жангари гуруҳлар томонидан амалга оширилган».

Теҳрон айбловларни рад этиб, ҳужумга алоқаси йўқлигини билдирган.