АҚШнинг юқори мартабали мулозимлари Германиядаги ўта ўнг қанотга мансуб “Германия учун муқобил” партиясининг экстремистик тузилма деб тан олинишини қоралаб баёнот берди. Расмий Берлин Вашингтоннинг айбловини асоссиз деб баҳоламоқда. 

Гап шундаки, Германиянинг Конституцияни муҳофаза этиш бўйича федерал идораси (BfV) “Германия учун муқобил” (АдГ) партияси фуқароларни миллий ва жуғрофий мансублигига кўра ажратмоқда, яъни айирмачилик сиёсати юритмоқда деган хулосага келган.

Февраль ойида бўлиб ўтган федерал сайловда “Германия учун муқобил” сайловчиларнинг 20 фоиз овозини ҳамда 630 ўринли парламентда 152 мандатни қўлга киритган. Партия миграцияга қарши кескин позицияси билан ажралиб туради. Хатарли жиҳати, ушбу сиёсий ҳаракат миллатчилик руҳидаги қарашларни ҳам дастаклайди. Шунга кўра Германиядаги бошқа сиёсий партиялар “Германия учун муқобил” партиясини ҳукумат коалициясига яқинлаштирмасликка уриниб келмоқда.

Партиянинг экстремистик деб тан олиниши президент Доналд Трамп маъмуриятига хуш келмаган. Жумладан, вице-президент Жей Ди Вэнс “немис бюрократлари” совуқ уруш рамзи бўлган Берлин деворини қайта тиклашга уринаётгани ҳақида ёзган. Давлат котиби Марко Рубио эса Германия ҳукуматини “тирания”да айблаган.

АҚШ мулозимларининг иддаоларига ижтимоий тармоқлари орқали жавоб қайтарган Германия ташқи ишлар вазирлиги “Германия учун муқобил” партияси айнан демократия талаби асосида экстремистик тузилма деб тан олинганини қайд этган.

“Мамлакатимиз тарихи ўнг экстремизмнинг ўсишига йўл қўймаслик кераклигини ўргатди”, – дейилади баёнотда.

Бу ўринда расмий Берлин 1933 йилда Адолф Ҳитлер бошчилигидаги миллатчиларнинг ҳокимиятга келганига ишора қилаётганини сезиш мумкин.  

АҚШнинг Европадаги энг яқин иттифоқчиси билан “сен-мен”га бориши икки ўртадаги муносабатларда дарз ҳосил бўлаётгани ҳақидаги фаразларни дастаклайди.

Аввал хабар берганимиздек, АҚШ вице-президенти Жей Ди Вэнснинг жорий йил 14 февраль куни хавфсизлик бўйича Мюнхен анжуманида Европа етакчиларига ёш боладек дарс ўтишга урингани ҳам уларни дарғазаб қилган эди.

Дипломатик майдондаги даҳанаки тортишув Трамп маъмурияти Европа давлатларига қарши бож уруши очган даврга тўғри келмоқда.