Буюк Британияни жангари супер чумолилар босмоқда. Tapinoma magnum турига мансуб бу чумолиларнинг битта колонияси «аҳолиси» 5 миллионгача етиши мумкин, деб ёзди Daily Mail.

Таъкидланишича, бу чумолилар Европанинг айрим мамлакатларига зиён етказишга улгурди: йўлакларни босиб кетган, электр тармоқларида узилишларга сабабчи бўлган ва инфратузилмага шикаст етказган. Швейцарияда эса чумолиларнинг дастидан 3 млрд фунт стерлинг қийматидаги объект қурилиши тўхтаб қолди.

Tapinoma magnum ташқи кўринишидан одатий қора чумолилардан деярли фарқ қилмайди, бироқ жангарироқ ва ноодатий ижтимоий тузилмага эга. Супер чумолилар колониясида минглаб она чумолилар бўлади, оддий чумолиларнинг онаси эса битта. Гуруҳлари ўзаро тўқнаш келганда, Tapinoma magnum чумолилари жанг қилмайди, балки бирлашиб, янада йирик колония ҳосил қилади ва ҳудудини кенгайтиради. Қолаверса, сал хавф туғилса, супер чумолилар манзилини ўзгартиришни бошлайди.

Британ энтомологлари супер чумолилар Уэст-Сассекс ва Силли оролларида пайдо бўлганини қайд этишди. Олимларнинг огоҳлантиришча, уларга қарши курашда инсектицидлар ёрдам бермайди.