«India Times» газетаси 2030 йилга бориб сувга ғарқ бўлиш хавфи остидаги шаҳарлар рўйхатини тузди. Ҳинд журналистлари бунинг учун иқлим ўзгаришларини ўрганувчи Climate Central ташкилоти харитаси маълумотларидан фойдаланишди.

Биринчи нишон — Амстердам. Нидерландия пойтахти жаҳондаги энг гўзал шаҳарлардан: албатта, кўприклари ҳам бисёр, аммо улар керак бўлмай қолиши мумкин — шаҳар бутунлай сувга чўкиш хавфи остида. Иқлим исиши дунё океани сатҳининг сезиларли кўтарилишига олиб келадики, ҳатто тошқинларга қарши курашиб тобланган голландларга-да осон кечмайди.

Рўйхатдаги иккинчи шаҳар — Басра (Ироқ). Шаҳар Шатт ал-Араб дарёсининг Форс кўрфазига қуйилишига яқин қисмида жойлашган. Басранинг теварак-атрофида ботқоқликлар мўл, яна ўн йил ичида шаҳар қисман ёки бутунлай сувга ғарқ бўлиши мумкин.

Нашр ёзишича, иқлим ўзгаришлари глобал миқёсдаги табиий офатларни келтириб чиқаради. 2030-йилларга бориб сув тошқинлари, шунингдек, Янги Орлеан (АҚШ), Адриатика денгизидаги 118 оролда жойлашган Венеция (Италия), Осиёдаги миллионлаб аҳоли яшовчи Ҳошимин (Вьетнам) ва Калкутта (Ҳиндистон) сингари шаҳарлар тақдирини савол остида қолдиради.