Европа Иттифоқи Исроилнинг Фаластин ҳудудлари устидан суверенитетини тан олмайди ва ўз позициясида қатъий қолади. Бу ҳақда 25 феврал куни Брюсселда ўтган брифингда ЕИ дипломатияси раҳбари Кая Калласнинг расмий вакили Анвар ал-Ануний маълум қилди.

Унинг таъкидлашича, Евроиттифоқ Исроилнинг 1967 йилдан бери босиб олинган ҳудудлар устидан суверенитетини тан олмайди. Бу баёнот Исроилнинг Иордан дарёсининг Ғарбий қирғоғида назоратни кучайтириш ва кўчириш сиёсатига жавобан берилди.

Ал-Ануний Исроилнинг аҳоли пунктларини кенгайтириши БМТ Хавфсизлик Кенгашининг 2334-резолюциясига зид эканини эслатди. Ушбу ҳужжат қурилишларни халқаро ҳуқуқ бузилиши деб баҳолайди ва уни зудлик билан тўхтатишни талаб қилади. ЕИ бундай ҳаракатлар «икки давлат» тамойили асосидаги тинчлик истиқболларига путур етказади деб ҳисоблайди.

Еврокомиссия раҳбари Урсула фон дер Ляйен ҳам аҳоли пунктлари кенгайиши фонида Исроилга нисбатан чеклов чораларини қўллашни таклиф қилган. «Бу чоралар ҳали ҳам кун тартибида турибди», — дея қўшимча қилди ал-Ануний.