Ҳиндистон ҳукумати Жанубий Кореянинг технология гиганти Samsung`ни импорт божларини тўламагани учун 601 миллион доллар жаримага тортди. Жарима нафақат компанияга, балки унинг бир қатор топ-менежерларига нисбатан ҳам молиявий санкцияларни ўз ичига олади. Бу ҳақда GizmoChina нашри хабар берди.

Жарима Samsung компанияси томонидан олиб кирилаётган телекоммуникация ускуналари учун божларни тўламаслик билан боғлиқ. Бу Ҳиндистон ҳукумати томонидан жорий этилган энг йирик солиқ жазоларидан биридир.

Жаримадан ташқари, Ҳиндистон ҳукумати Samsung компаниясининг етти нафар раҳбарини жами 81 миллион доллар жаримага тортди. Жаримага тортилган раҳбарлар орасида тармоқ бўлими вице-президенти Сунг Бим Хонг, молиявий директор Донг Вон Чу, Шеэтал Жаин молиявий директори ва билвосита солиқлар бўйича бош менежер Никҳил Аггарвал бор.

Samsung 4G телекоммуникация ускунасининг асосий компоненти бўлган Remote Radio Heads`ни нотўғри таснифлашда айбланмоқда. Расмийларга кўра, бу тасниф компанияга 10 дан 20 фоизгача бўлган божларни тўлашдан қочиш имконини берди.

Импорт 2018 ва 2021 йиллар оралиғида амалга оширилган ва 784 миллион долларлик компонентларни ўз ичига олган. Ускунанинг харидори Мукеш Амбанининг Reliance компанияси эди. Қайд этилишича, Samsung компаниясининг 2024 йилда Ҳиндистондаги соф фойдасининг салмоқли қисми (тахминан 955 миллион доллар) ушбу етказиб беришлар эвазига қўлга киритилган.

Samsung ҳозирча вазиятга изоҳ бермади. Компания Ҳиндистон расмийларининг қарори устидан шикоят қилиши кутилмоқда.