Жорий ҳафта бошида Европанинг бир қанча минтақаларини қамраб олган кенг кўламли электр таъминоти узилиши оқибатида камида беш киши ҳалок бўлди.

Испаниянинг Оренсе вилоятидаги Табоадела шаҳарчасида бир оиладан уч киши: 81 ёшли эркак, 77 ёшли унинг аёли ва 56 ёшли ногирон фарзанди  ўз уйида ҳалок бўлган. Терговга кўра, улар электр таъминоти узилган пайтда нафас олиш ускунаси учун ёқилғи генераторидан фойдаланган. Генераторнинг ёмон вентиляция қилинган хоналарда ишлаши натижасида углерод оксиди (CO) тарқалган ва оила аъзолари заҳарланиб ҳалок бўлган.

Валенсия вилоятининг Алсира шаҳрида, 46 ёшли аёл нафас олишни таъминловчи кислород аппарати токсиз қолганидан кейин ҳаётдан кўз юмди. Унинг ўлими ҳақида хабар берилгач, полиция ва тиббий ёрдам ходимлари ёрдам кўрсатишга шошилишган, аммо аёлни сақлаб қолишга улгурмаган.

Мадриднинг Карабанчел туманида эса, шанба куни кечқурун электр узилиши пайтида бир уйда ёнғин келиб чиққан ва натижада аёл киши ҳалок бўлган. Илк маълумотларга кўра, ёнғин сабаби шам ёқилгани бўлиши мумкин. Ҳодиса жойидаги қора тутун бир неча хонадонларга тарқалган, 13 киши жароҳатланган ва шундан 5 нафари шифохонага ётқизилган.

Шунингдек, Галисия (Каталония) минтақасида заҳарли газ тарқалиши билан боғлиқ яна 9 та ҳолат қайд этилган ва Рианхода икки киши углерод оксиди билан заҳарланиб шифохонага ётқизилган.

Ҳозирда тергов ишлари давом этмоқда. Электр таъминоти тикланмаган жойларда аҳоли ҳануз қоронғуликда қолмоқда.