Япония ҳарбий учувчилари раҳбариятдан кутилмаган кўрсатма олишди: унда номаълум учар жисм (НУЖ) ёки оддий тилда айтганда «учар ликопча»га дуч келганда нима қилиш кераклиги кўрсатилган. Бу ҳақда кунчиқар мамлакатнинг NHK телеканали хабар берди.

Кўрсатмага кўра, «учар ликопча»ни кўрган учувчи дарҳол қўмондонликни бохабар этиб, НУЖни фото ва видеотасвирга олиши керак. Бу ҳазил эмас: кўрсатма Япония мудофаа вазири Таро Кано имзоси остида барча ҳарбий идораларга тарқатилган.

Ҳужжатда, хусусан, НУЖ ёки учувчисиз учар жисмни аниқлаган учувчи объект ҳақида дарҳол қўмондонликка хабар бериши ва уни камераларда суратга олиши кераклиги кўрсатилган. Бундан мақсад объектнинг Япония учун қанчалик хавф туғдиришини тезкор баҳолаш ва таҳлил қилишдир. Таъкидлаш керакки, Таро Кано олдинги чиқишларида мамлакат ҳаво кучлари учувчилари ҳали НУЖларга дуч келишмаганини, қолаверса, ўзи ҳам «учар ликопчалар» борлигига ишонмаслигини айтганди. Аммо эҳтимолий ҳолатларга олдиндан ҳозирлик кўриб қўйиш ҳам зарар қилмайди.