АҚШ Президенти Доналд Трамп Оқ уйда Украина Президенти Владимир Зеленский ва Исроил Бош вазири Бинямин Нетаняҳу билан алоҳида учрашувлар ўтказди. Оқ уй музокараларни «ижобий ва самарали» деб баҳолади.

Зеленский билан учрашувда Украина ҳаво мудофаасини кучайтириш, хусусан Patriot мажмуалари учун ракета-тутқичлар етказиб бериш ва уларни Украинада лицензия асосида ишлаб чиқариш масаласи муҳокама қилинди. Зеленскийнинг айтишича, Трамп Украинага бундай лицензия беришга розилик билдирган.

Шунингдек, Украина президенти АҚШ Конгресси аъзолари билан ҳам учрашиб, Россия нефти ва газини харид қилувчиларга қарши янги санкциялар ташаббусини қўллаб-қувватлади.

Нетаняҳу билан музокараларда эса асосий эътибор Эроннинг ядровий дастури ва Яқин Шарқдаги вазиятга қаратилди. Исроил Бош вазири Трамп билан Эроннинг ядровий қуролга эга бўлишига йўл қўймаслик бўйича умумий позиция шаклланганини маълум қилди ва буни АҚШ президенти билан ўтказган «энг яхши суҳбатлардан бири» деб атади.

Учрашувлардан кўп ўтмай АҚШ ҳарбийлари Эрон кучлари Яқин Шарқдаги Америка ҳарбий объектларига ракета ҳужуми уюштиришга уринганини, барча ракеталар тутиб қолинганини билдирди. Шунингдек, АҚШ ва Саудия Арабистони кучлари Ироқ шарқида Саудия энергетика инфратузилмасига дрон ҳужумлари уюштиргани айтилган Эронга яқин қуролли гуруҳларга қарши зарбалар берганини маълум қилди.