Ҳар бир халқ ва миллатларда тонгни қаршилашнинг ўзига хос одатлари бор. Кимдир қуёш чиқишини кузатишни хуш кўрса, бошқалар эрталабдан сёрфинг (тўлқинлар орасида махсус спорт тахтасида сузиш)га чиқади ёки қаҳва ичиб тонгни қаршилайди.    

 Япония: қуёшни қарши олиш

Япония «Қуёш чиқар юрт» деб аталади ва бу тасодиф эмас. Бу ерда тонг қуёш чиқиши билан ўзига хос тарзда қаршиланади. Одамлар қуёшнинг илк нурларини кузатиш учун тоғлар ёки денгиз бўйларига чиқишади. Бу янги умид ва бахт рамзи ҳисобланади.

Бразилия: сёрфинг ва рақс билан тонг

Рио-де-Жанейро аҳолиси тонгни байрам кайфиятда кутиб олади. Эрталабдан пляжда югурадиганлар, денгиз бўйида мусиқа тинглаб рақсга тушадиганлар ва махсус тахтада тўлқинлараро сузадиганлар кўп. Бразилияликлар учун эрталабки соатлар –тетиклик ва куч йиғиш вақти.

Ҳиндистон: Гангада ибодат ва покланиш

Ҳиндистонликларнинг кўпчилиги тонгни муқаддас Ганга дарёсида чўмилиб ибодат қилиш билан кутиб оладилар. Улар учун бу нафақат жисмоний, балки маънавий покланишнинг рамзи ҳамдир. Ҳиндлар тонгни янги умидлар билан бошлаш учун табиат ва руҳан тозаланишга эътибор қаратадилар.

Италия: қаҳва ва сукунат

Италияликлар учун тонг – бу завқ билан кутиб олинадиган вақт. Кичик қаҳвахоналарда эспрессо ёки капучино қаҳвасини ичиш, газеталарни варақлаб, кечаги воқеалардан хабардор бўлиш уларнинг кундалик одатидир. Эрталабни сукунат ва завқ билан бошлаш – итальянлар учун ҳаёт тарзи.

Нидерландия: велосипедда тонг сайри

Голландияликлар учун эрталабки вақт – фаоллик вақти. Улар кунни велосипед сайри билан бошлашади. Эрталабданоқ шаҳарлар тоза ҳавода ҳаракатланаётган юзлаб велосипедчилар билан тўлади – одамлар иш ёки ўқишга айнан шу транспортда йўл олади. Бу нафақат соғлом турмуш тарзи, балки экологик жиҳатдан ҳам фойдали одатдир.

 Норвегия:  тонг байрами

Норвегияда қиш ойларида айрим ҳудудларда қуёш чиқмайди. Бир неча ойлик қоронғиликдан сўнг, биринчи тонг нурлари пайдо бўлиши – ҳақиқий байрам!   Одамлар қуёшнинг илк нурларини кутиб олиш учун йиғилишади ва буни байрамона нишонлайдилар.

Австралия: сёрфинг билан уйғониш

Сидней ва Голд Кост каби жойларда одамлар тонгни океан тўлқинларига қарши сузиб қаршилайдилар. Бундай машғулот нафақат спорт, балки кунни енгил ва завқли бошлаш усули ҳамдир. Австралияликлар учун бу нафақат завқ, балки ҳаёт тарзининг ажралмас қисми.

Ҳар бир халқ ва маданият тонгни ўзгача тарзда қарши олади. Кимдир сукунатни хуш кўради, кимдир шовқин-сурон билан кутиб олади, бошқалар эса табиат қўйнида уйғонишни маъқул кўради. Сиз бугун тонгни қандай қаршиладингиз?