Қозоғистон Президенти Қосим-Жўмарт Тўқаев 1 сентябрь куни мамлакат аҳолисига мурожаатида тил муаммосига изоҳ берди.

Тўқаев рус тилидан фойдаланишга тақиқ қўйилишига қарши чиқди. Шу билан бирга, «Ўз келажагини Қозоғистон билан боғлайдиган ҳар бир фуқаро қозоқ тилини ўрганиши шарт», дея таъкидлаган у.

«Мамлакатимизда фақат битта давлат тили бор — қозоқ тили. Рус тили расмий тил мақомига эга. Унинг ишлатилиши бизнинг қонун ҳужжатларимизга мувофиқдир ва бунга қаршишик кўрсатиш мумкин эмас. Мамлакатимиз билан ўз келажагини боғлайдиган ҳар бир фуқаро қозоқ тилини ўрганиши шарт. Бу ватанпарварликнинг асосий мезони. Агар ёш авлод бу тилларни, шу жумладан, рус тилини ўрганса, ютқазмайди. Қозоғистон ва Россия ўртасидаги чегара дунёдаги энг узун чегарадир. Рус тили — БМТ ташкилоти тан олган тиллардан бири, шунинг учун биз бу масалага оқилона ёндашишимиз керак», — дея таъкидлаган Тўқаев.

Шу билан бирга, Қозоғистон Президенти мамлакатда «одамларни тилига, миллий ўзига хослигига қараб камситишга» йўл қўймаслигини, бошқача қилиб айтганда, «шунга ўхшаш қонунбузарликлар Конституцияга хилоф эканлиги ҳамда бутун мамлакатга зарар келтиради», дея қўшимча қилган.

Аввалроқ, ОАВ Қозоғистонда «Til Maydani Онлайн Партияси» You Tube канали муаллифи, мамлакатнинг русийзабон фуқароларига қарши «тил рейдлари» билан боғлиқ видео эълон қилган Куат Ахметов республикадан қочиб кетгани ҳақида хабар берилган эди.