Доналд Трамп мамлакатнинг янги «Биринчи борт»и – Air Force One’ни жамоатчиликка таништирди.

Қатар томонидан тақдим этилган Boeing 747-8 самолёти АҚШ Мудофаа вазирлиги буюртмаси асосида тўлиқ модернизация қилинган. Трамп уни «дунёдаги энг ҳашаматли самолёт» деб атади.

«Сиз уни кўрсангиз, ишонмайсиз. Ёғоч безаклар сифати, материаллар ва двигателлар даражаси ҳайратланарли», – деди АҚШ раҳбари Вашингтон яқинидаги Эндрюс ҳарбий базасидаги тақдимот маросимида.

Оқ уй раҳбарининг таъкидлашича, янги самолёт аввалги президент лайнерларига нисбатан узоқроқ масофага ва юқори тезликда уча олади.

АҚШ Ҳарбий-ҳаво кучлари маълумотига кўра, самолёт хавфсизлик, алоқа ва логистика тизимлари бўйича янгиланган. Интерернинг ҳозирги кўриниши эълон қилинмаган бўлса-да, унинг аввалги ҳашаматли услуби сақлаб қолингани айтилмоқда.

ОАВ ва авиация мутахассислари баҳолашича, Boeing 747-8 самолёти Қатар томонидан топширилган пайтда тахминан 400 миллион долларга баҳоланган. Модернизация ишларидан кейин унинг умумий қиймати 1 миллиард долларга яқинлашган бўлиши мумкин.

Трампнинг маълум қилишича, янги Air Force One 4 июл куни АҚШ мустақиллигининг 250 йиллиги муносабати билан ўтказиладиган авиашоуда иштирок этиши мумкин. Президент самолётдан илк расмий парвозни июл ойи бошида НАТО саммитига йўл олишда амалга оширишни режалаштирмоқда.