АҚШ президенти Доналд Трамп БРИКС блокини қўллаб-қувватловчи давлатларга 10 фоизлик қўшимча бож жорий этиш билан таҳдид қилди.

“БРИКСнинг аксиламерика сиёсатини дастакловчи ҳар қандай давлатга 10 фоизлик қўшимча бож жорий этилади. Истиснолар бўлмайди”, – деб ёзди Трамп Truth Social платформасида.

АҚШ президенти жорий йил бошида ҳам БРИКС халқаро савдода доллардан воз кечгудек бўлса, 150 фоизлик бож киритиш билан пўписа қилганди. 

Оқ уй матбуот котиби Кэролайн Левиттга кўра, Трамп БРИКСни АҚШ учун таҳдид деб ҳисоблайди.

“Трамп БРИКС АҚШ манфаатларига қарши иш тутмоқда деб ҳисоблайди. У дунё майдонида Америкага нисбатан адолатли муносабатни ўрнатади. Бошқа мамлакатлар АҚШ ва халқимизни ўз манфаати йўлида фойдаланмаслиги учун бошқа зарур чораларни ҳам кўради”, – деган Оқ уй матбуот котиби. 

Вашингтоннинг БРИКСга қарши баёноти Бразилияда 6-7 июль кунлари мазкур блокнинг саммити бўлиб ўтган паллада янграмоқда.

АҚШ президенти Трампнинг қўшимча бож жорий этиш ҳақидаги баёнотига  Россия Федерацияси Хавфсизлик кенгаши раиси ўринбосари Дмитрий Медведев X платформасидаги саҳифасида муносабат билдирган.

“БРИКСнинг нуфузи ошиб бормоқда. Трамп БРИКСни қўллаб-қувватловчи ҳар қандай давлатга 10 фоизлик бож жорий этишини эълон қилди. Демак, биз барча ишларни тўғри қилмоқдамиз”, – деб ёзган Россиянинг собиқ президенти Медведев.

Маълумот ўрнида: 2009 йили Бразилия, Россия, Ҳиндистон ва Хитой БРИК деб аталган норасмий бирлашмага асос солганди. 2010 йилда унга ЖАР қўшилди ва бирлашма номи БРИКСга айланди. Кейинги йилларда бирлашмага Миср, Эрон, БАА, Эфиопия ва Индонезия қўшилди. Бирлашманинг кенгайтирилган формати БРИКС+ деб аталади.

Ўтган йил октябр ойида 13 мамлакат қатори Ўзбекистонга БРИКСнинг шерик-давлати мақоми берилган.

Трамп ва Медведевнинг даҳанаки тортишуви БРИКС мавзуси билан чекланмади.

Трамп куни кеча Оқ уйда Исроил бош вазирини қабул қилар экан, Украинага қурол-аслаҳа етказиш қайта йўлга қўйилганини маълум қилди. У, шунингдек, Россия президенти Владимир Путиндан норози эканини таъкидлади. 

Дмитрий Медведев Трампнинг ушбу чиқишига муносабат билдирар экан, Трампнинг зиддиятли баёнотларига эътибор қаратмаган маъқул эканини қайд этди. 

АҚШнинг амалдаги ва Россиянинг истеъфодаги собиқ президентлари июнь ойида ҳам ижтимоий тармоқларда баҳсга киришганди.

Медведев 22 июнь куни Телеграмдаги саҳифасида дунёнинг бир қатор мамлакатлари Эронга жанговар ядро комплектларини беришга тайёр экани ҳақида шов-шувли пост қолдирганди.

Трамп бунга жавобан ядро қуроли масаласида ўта эҳтиёткор бўлиш лозимлигини уқтирганди.