Ўзбекистон Республикаси Президенти Шавкат Мирзиёевнинг Россия Федерациясига расмий ташрифи доирасида «Ўзбекнефтгаз» АЖ ва «ВЕБ.РФ» ўртасида 40 миллион евролик келишувга эришилди.

«ВЕБ.РФ» кузатув кенгаши раҳбари ўринбосари Д.В. Алгульян ва «Ўзбекнефтгаз» АЖ Меҳриддин Абдуллаев ушбу битимни имзоладилар.

«ВЕБ.РФ» давлат тараққиёт корпорацияси мамлакатимизда нефт-газ соҳасидаги лойиҳаларни ва чора-тадбирларни амалга ошириш доирасида «Ўзбекнефтгаз» жамиятининг ишончли молиявий шерикларидан биридир.

Жалб қилинадиган маблағлар асосан «Ўзбекнефтгаз» АЖ томонидан геология-қидирув ишларини олиб бориш, қудуқларни бурғулаш ва углеводородларни қазиб чиқариш учун зарур бўлган технологик ускуна ва моддий-техник ресурсларни Россия давлатидаги ишлаб чиқарувлардан сотиб олиш бўйича шартномаларни молиялаштиришга йўналтирилади.

Айтиш жоизки, 2020 йилда ҳам «ВЕБ.РФ» корпорацияси томонидан жамиятга 40 миллион евролик битим имзоланиб, унинг доирасида зарур маҳсулот ва хизматлар харид қилинган.

Мазкур маблағларининг жалб қилиниши жамият олдида турган асосий устувор вазифа, яъни углеводородлар заҳирасини ошириш ва уларни қазиб чиқариш ҳажмларини оширишга, иқтисодий тармоқлар ва аҳолига узлулксиз равишда табиий газ етказиб беришни таъминлашга хизмат қилади.

Эслатиб ўтамиз, «ВЕБ.РФ» Давлат тараққиёт корпорацияси иқтисодий ривожланиш лойиҳаларини молиялаштирувчи давлат инвестиция банки бўлиб, унинг асосий вазифаси инфратузилма, саноат, ижтимоий соҳа, технологик салоҳиятни мустаҳкамлаш ва аҳоли турмуш тарзини оширишга қаратилган лойиҳаларни амалга оширишда ҳисса қўшишдан иборат.