Президент Шавкат Мирзиёев Иқтисодий ҳамкорлик ташкилотининг 16-саммитидаги нутқида транспорт-коммуникация масалаларига ҳам тўхталиб ўтди.

Ўзаро транспорт-коммуникация боғлиқлигини кучайтириш ҳақида сўз юритар экан, Шавкат Мирзиёев аъзо давлатларнинг аксарияти денгизга тўғридан-тўғри чиқиш имкониятига эга эмаслигини таъкидлади.

Шу билан бирга, Осиё-Тинч океани, Жанубий Осиё, Яқин Шарқ ва Европа минтақаларининг йирик бозорлари билан боғлайдиган ва бизнинг ҳудудларимиз орқали ўтадиган трансконтинентал транспорт йўлаклари салоҳиятидан тўлиқ фойдаланиш зарурлиги айтилди.

«Келгусида «Хитой – Қирғизистон – Ўзбекистон» ва Трансафғон мультимодал йўлларининг ишга туширилиши барча аъзо давлатлар манфаатларига мос келади.

Тошкентда 2 ноябрда бўлиб ўтган транспорт вазирларининг йиғилишида «Ўзбекистон – Туркманистон – Эрон – Туркия» транспорт йўлагини ривожлантириш бўйича қабул қилинган ҳужжатга бошқа аъзоларни ҳам қўшилишга, ўзаро тариф ва йиғимларни мақбуллаштиришга чақираман», – деди Шавкат Мирзиёев.

Юк ташиш ҳужжатларини рақамлаштириш каби замонавий тизимларни кенг жорий қилиш ҳамда самарали мувофиқлаштириш учун Тошкент шаҳрида Ташкилотнинг Рақамли транспорт ва божхона офисини ташкил этиш ташаббусини билдирилди.