2023/2024 ўқув йилидан бошлаб педагог кадрлар тайёрловчи олий таълим муассасаларининг қўшма таълим дастурларида таълим олаётган талабаларнинг ҳамкор хорижий олий таълим муассасасида ўқиш даври учун тўлов-контракт қиймати Давлат бюджети маблағлари ҳисобидан қоплаб берилади. 

Президентнинг педагог кадрлар тайёрловчи таълим муассасалари фаолиятини яхшилашга доир 289-сонли қарорида белгиланишича, ушбу тоифадаги талабаларнинг ўқиш даври учун тўлов-контрактини бюджетдан қоплаш қуйидаги тартибда амалга оширилади:

• педагог кадрлар тайёрловчи олий таълим муассасаларининг қўшма таълим дастурларида тўлов-контракт асосида таълим олаётган ва юқори академик кўрсаткичларга эга бўлган талабалари ўртасида танлов ўтказилади;
• танловда ғолиб бўлган талабалар билан давлат мактабгача, умумий ўрта, ўрта махсус, профессионал ва олий таълим муассасаларида камида уч йил ишлаб беришни назарда тутувчи шартнома расмийлаштирилади;
• педагог кадрлар тайёрловчи олий таълим муассасаларининг қўшма таълим дастурларида таълим олаётган талабаларнинг тўлов-контракт қийматини қоплаш учун маблағлар Ўзбекистон Республикасининг республика бюджетидан биринчи даражали бюджет маблағларини тақсимловчи сифатида тегишинча Олий ва ўрта махсус таълим вазирлиги, Халқ таълими вазирлиги ҳамда Мактабгача таълим вазирлигига ажратилади;
• педагог кадрлар тайёрловчи олий таълим муассасаларининг қўшма таълим дастурларида таълим олаётган талабаларнинг тўлов-контракт қийматини қоплаш учун ажратиладиган маблағлар Олий ва ўрта махсус таълим вазирлиги, Халқ таълими вазирлиги ҳамда Мактабгача таълим вазирлигининг Молия вазирлиги Ғазначилигида очилган алоҳида шахсий ғазна ҳисобварағида назарда тутилади.

Изоҳ: мазкур қарор 2022 йилнинг июнь ойида қабул қилингани сабабли вазирликлар эски номада кўрсатилган.