Аксарият одамлар «дори ичсам, тезроқ тузаламан» деб ўйлайди. Аммо бир вақтнинг ўзида жуда кўп дори ичиш (тиббиётда буни полифармация дейишади) —  фойдадан кўра кўпроқ зарар келтиради.

Дорилар бир-бирига таъсир қилиб, организмда кутилмаган ножўя таъсирларни чақириши мумкин. Айниқса, ёш ўтган сайин бу хавф ортади: 70 ёшдан ошган ҳар ўн кишидан бири 10 ва ундан ортиқ дори ичади.

Кўпинча одамлар шундай тузоққа тушиб қолишади:

• Биринчи дорининг ножўя таъсири пайдо бўлади (масалан, меъда оғриши);
• Шифокор эса буни янги касаллик деб ўйлаб, унга қарши яна бир дори ёзади;
• Бу янги дори эса бошқа муаммоларни бошлайди, натижада дорилар сони кўпайиб кетади;
• Инсонда онг хиралашуви, хотира сусайиши, қон босимининг беқарорлиги ва энг хавфлиси — йиқилиб жароҳат олиш хавфи ошади.

Шифокорлар одатда дори ёзишни ўргатишади, лекин кераксиз дорини қандай тўхтатишни камдан-кам ўргатишади. Беморлар ҳам ҳаёт тарзини ўзгартиришдан кўра, тезроқ «таблетка ичиб қутулиш»ни афзал кўришади. Фармацевтика компаниялари ҳар бир симптом учун янги дори сотишдан манфаатдор.

Шифокорлар кўпинча дорини камайтириш ҳақида ўзлари гап очишмайди, шунинг учун ташаббусни ўз қўлингизга олинг:

• Қайси дорини, қанча дозада ва нима учун ичаётганингизни қоғозга ёзиб юринг;
• «Бу дори менга чиндан ҳам керакми?», «Қачон тўхтата оламан?», «Бошқа дориларим билан бирга ичсам зарари йўқми?» деб шифокордан очиқчасига сўранг;
• Ҳар сафар янги дори ёзилганда, унинг фойдаси ва зарари ҳақида тўлиқ маълумот олинг;
• Имкон қадар даволашни энг оз миқдордаги дори билан бошлашга ҳаракат қилинг, шунда нима ёрдам бераётганини тушуниш осон бўлади.
•