Куз фаслида соғлом ва тетик қолиш – тўғри овқатланиш, иссиқ кийиниш ва иммунитетни асрашга боғлиқ. Кузги совуқ ва мавсумий шамоллашлардан ҳимояланиш учун оддий, аммо фойдали қоидаларга амал қилиш мақсадга мувофиқдир. Қуйида куз ойларида соғлиқни тиклаш ва касалликка чалинмаслик бўйича энг муҳим тавсиялар жамланган.

 Ейишдан бошлаймиз...

Куз – табиат бизга энг сархил ва витаминларга бой мева ҳамда сабзавотларни тақдим этадиган давр. Иммунитетни бақувват қилиш учун қуйидагиларни таомномага киритинг:

Мавсумий сабзавотлар. Ошқовоқ, сабзи, лавлаги ва карам таркибида антиоксидантлар ҳамда А ва C витаминлари жуда кўп. Айниқса, ошқовоқли таом куз учун ҳақиқий шифодир.

Мева ва резаворлар. Олма, анор, нок ва наъматак чойи сизни вирус ва бактериялардан ҳимоя қилади.

Иссиқ таом ва шўрвалар. Суюқ ва иссиқ шўрвалар (айниқса, товуқ шўрва) танани ичидан қиздиради ва моддалар алмашинувини яхшилайди.

Табиий антибиотиклар. Саримсоқпиёз, пиёз ва занжабил (имбир) қон айланишини яхшилаб, микробларга қарши курашади.

Қандай кийинган маъқул?

Куз ҳавоси алдамчи бўлади: эрталаб совуқ, тушда иссиқ, кечқурун эса яна изғирин кузатилади.

"Карам услуби" (қатламли кийиниш). Бир йўла қалин кийим кийишдан кўра, бир нечта енгилроқ кийимни устма-уст кийиш афзал (масалан: футболка, устидан кўйлак ёки свитер, устидан куртка). Ҳаво исиганда биттасини ечиб қўйиш қулай.

Табиий матолар. Пахта ва юнгдан тайёрланган кийимлар танани иссиқ тутади ва терини нафас олдиради.

Оёқ ва бош кийим. Оёқларни доимо қуруқ ва иссиқ тутинг. Намлик ўтказмайдиган пойабзал ва шамолдан ҳимоя қилувчи енгил бош кийим (шапка) сизни хасталикдан асрайди.

Шамоллашдан сақланиш учун...

Иммунитетни кузги инжиқликларга тайёрлашда қуйидаги одатларни шакллантиринг:

Сув балансини сақланг. Кун давомида илиқ сув, лимонли чой ёки наъматак дамламасини ичиб юринг.

 Шахсий гигиена...

Кўчадан келганда қўлларни совунлаб ювиш ва бурун-томоқни тузли сувда чайиш вируслар тарқалишининг олдини олади.

Хонани шамоллатиш. Уй ва ишхона хоналарини кунига камида 2 марта 10-15 дақиқа давомида шамоллатиб туринг. Қуруқ ҳавода вируслар тез кўпаяди.

Уйқу ва дам олиш. Кунига камида 7-8 соат ухлаш тананинг тикланиши ва иммунитет тизими тўғри ишлаши учун жуда муҳим.

Сиз куз фаслида ўзингизга ғамхўрлик қилиш орқали нафақат шамоллашдан сақланасиз, балки олтин фаслнинг гўзаллигидан тўлиқ завқ ола оласиз! Бунинг учун, энг муҳими, эринманг ва қоидаларга амал қилинг.

А.Фатҳуллаев