Байрам ва муҳим саналар

• Полиция ходимлари куни (Арманистон).
• Биринчи конституция куни (Болгария).
• Қиролича Маргрете таваллуди куни (Дания).

Воқеа-ҳодисалар

• 1607 йил — инглизлар Виржинияга доимий яшаш учун кўчиб кела бошлашди.
• 1705 йил — қиролича Анна Исаак Нютонга рицарлик унвонини берди.
• 1797 йил — Россия императори Павел I га тож кийдириш маросими бўлиб ўтди.
• 1848 йил — Габсбурглар империясида қароллик бекор қилинди.
• 1862 йил — АҚШдаги фуқаролар уруши: шимолликлар Янги Орлеанни забт этишди.
• 1863 йил — Францияда «Plongeur» — XIX асрнинг энг йирик сувости кемаси сувга туширилди.
• 1871 йил — Германия империяси конституцияси қабул қилинди. Берлин империя пойтахтига айланди.
• 1906 йил — АҚШ ва Хитой ўртасида сувости кабели ётқизиш ишлари якунланди.
• 1912 йил — америкалик Ҳарриет Куимби самолётда Ла-Манш устидан учиб ўтган биринчи аёл бўлди.
• 1922 йил — СССР ва Германия ўртасида дипломатик алоқалар ўрнатилди.
• 1945 йил — Иккинчи жаҳон уруши: Германиянинг «Гойя» кемаси советларнинг «Л-3» сувости кемаси томонидан чўктириб юборилди. Мисли кўрилмаган даражадаги бу ҳалокат 6900 дан ортиқ инсоннинг умрига зомин бўлган.
• 1945 йил — Иккинчи жаҳон уруши: Берлин операциясининг бошланиши.
• 1947 йил — Жанубий Каролина сенати йиғилишида америкалик сиёсатчи ва молиячи Бернард Барух биринчи бўлиб «совуқ уруш» иборасини қўллади.
• 1948 йил — Европа иқтисодий ҳамкорлиги ташкилотига асос солинди.
• 1964 йил — америкалик учувчи Жералдина Мок самолётини Ғарбий Германияга қўндирди ва Ер шарини айланиб чиққан биринчи аёлга айланди.
• 1992 йил — Афғонистон президенти Муҳаммад Нажибулло тузумининг ағдарилиши.
• 1996 йил — профессионал бокс тарихида илк бор Ўзбекистон вакили — Артур Григорян жаҳон чемпиони бўлди. Германиянинг Ҳамбург шаҳрида рингга кўтарилган ҳамюртимиз пуэрто-риколик боксчи Антонио Риверни 12-раундда нокаутга учратди.
• 2003 йил — Япониянинг «NTT» корпорацияси жамоат жойларига ўрнатилган 100 мингдан зиёд телефон-автоматларини ёпишини маълум қилди. Бунга мамлакатда мобил алоқанинг кенг тарқала бошлагани сабаб бўлди.
• 2014 йил — Жанубий Корея жануби-ғарбий қирғоқларида «Севол» пароми ҳалокатга учради; 304 киши нобул бўлди.

Таваллуд кунлари

• 1319 йил — Иоанн II, Франция қироли.
• 1660 йил — Ҳанс Слоан, инглиз шифокори ва табиатшуноси. Унинг китоблари ва жамғармалари асосида Британия музейига асос солинган.
• 1844 йил — Анатол Франс, француз ёзувчиси, Нобел мукофоти лауреати.
• 1867 йил — Уилбер Райт, ихтирочи, авиаконструктор, машҳур ака-ука Райтларнинг каттаси.
• 1889 йил — Чарли Чаплин, инглиз ва америка актёри, режиссёр, сценарийнавис.
• 1940 йил — Маргрете II, Дания қироличаси.
• 1947 йил — Карим Абдулжаббор, америкалик баскетболчи.
• 1955 йил — Анри, Люксембург буюк герцоги.