Андроид қурилмалар учун Xabar.uz мобил иловаси. Юклаб олиш ×

Адвокатсиз ИИО бўлимига боришни истамаган шахс ҳақида маълумот берилди

Адвокатсиз ИИО бўлимига боришни истамаган шахс ҳақида маълумот берилди

Ижтимоий тармоқларда ички ишлар ходимлари бир фуқарони мажбуран ички ишлар бўлимига олиб боришга уринаётгани тасвирланган видео тарқаб кетган эди. Видеода фуқаро адвокатисиз ҳеч қаерга бормаслигини бот-бот такрорлайди, аммо ИИО ходимлари уни мажбуран машинага ўтказишга уринади.

Ушбу ҳолат юзасидан ИИББ томонидан баёнот берилди.

«Ижтимоий тармоқларда тарқалган видеода Чилонзор тумани ИИО ФМБ ходимлари Юнусобод туманида фуқарони ички ишлар органларига етказиш учун хизмат автомобилига ўтқизишга ҳаракат қилишаётгани туширилган. Фуқаро эса қаршилик кўрсатиб, адвокат таклиф этилишини талаб қилган. Шу билан бирга видеонинг матнида бошқа фуқаролар ҳам қайд этилган бўлиб, улардан бири илгари мол сотиб олиш учун ундан пул олган ва молни ҳам, пулни ҳам қайтариб бермаган шахсга нисбатан чора кўришни сўраб ички ишлар органларига ариза билан мурожаат қилган эди.

Мазкур факт бўйича қуйидагиларни маълум қиламиз. Жорий йилнинг 28 май куни Чилонзор тумани ИИО ФМБга келиб тушган аризада, И.М. мол сотиб олишни баҳона қилиб ундан катта миқдорда пул олган, аммо ваъдасида турмасдан, пулни ҳам қайтариб бермаган шахсларга нисбатан чора кўришни сўрарди.

Шу муносабат билан келиб тушган ариза бўйича текширув ўтказиш мақсадида Юнусобод туманида яшовчи Дилшод И.га жорий йилнинг 10 июнь куни Чилонзор тумани ИИО ФМБга 11 июнь куни етиб келиш ҳақида чақириқнома берилди. Шу билан бирга чақириқнома бериш вақтида унга чақирув сабаби ҳам тушунтирилган.

Дилшод И. Чилонзор тумани ИИО ФМБга чақирувни менсимаганлиги сабабли, Чилонзор тумани ИИО ФМБ 1-сон ички ишлар бўлими ходимлари Дилшод И.нинг турар жойига бориб, уни ички ишлар органларига етказишга мажбур бўлишган.

Ҳозирги вақтда тўпланган маълумотлар дастлабки тергов органларига қонуний чора кўрилиши учун йўналтирилган.

Дилшод И.ни қўлга олиш чоралари кўрилмоқда», — дейилади баёнотда.

Изоҳлар

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг