Алимент фарзандлар манфаатларини таъминлашга хизмат қилганлиги сабабли, ҳар қандай шароитда ҳам қидирув чоралари кўрилади ва қонуний жавобгарлик таъминланади.

Мажбурий ижро бюросининг Иштихон тумани бўлимида юритилган иш юзасидан, Фуқаролик ишлари бўйича Иштихон туманлараро судининг қарорига асосан, қарздор Ш.С.дан ундирувчи Г.Э. фойдасига фарзандининг моддий таъминоти учун алимент ундириш тўғрисида ижро ҳужжати келиб тушган.

Маълум бўлишича, қарздор ота узоқ вақтдан бери алимент тўловларини амалга оширмаганлиги сабабли қарзи 75 миллион сўмга етган.

Бундан ташқари, у номаълум жойда яшириниб юрган. Шу муносабат билан, бошқарманинг қидирув шўъбаси ходимлари томонидан унга нисбатан қидирув чоралари кўрилган.

Тезкор-қидирув тадбирлари давомида, қидирувдаги шахс Самарқанд шаҳридаги тилла дўконига бўлажак рафиқаси учун тилла буюмларни харид учун келганда қўлга олинган ва кейинги ижро ҳаракатларини амалга ошириш учун давлат ижрочисига топширилган.