Шу шиор остида 23 нафар фуқароларни Англия давлатига жўнатиш билан алдаб, йирик миқдордаги маблағларни ўзлаштирган маъулияти чекланган жамияти раҳбари суд ҳукми билан 6 йилга қамалди.

Бухоро вилояти, Вобкент туманидаги «Ҳаживон» маҳалласи, Бўйработ қишлоғида туғилган Ш.И.нинг 22 ёшга тўлиб-тўлмай, масъулияти чекланган жамият ташкил этиб, фаолиятини йўлга қўйгани қишлоқдошларида ҳавас уйғотган.  Қишлоқдошларининг ҳаваси унга «қанот» бўлган.

«Вобкентнинг ҳу-ув чеккасида яшасам. Одамлар учун кичиккина қилган бир ишинг ҳам «во-оо» бўлиб кўринади. Етмаганига қишлоқдошларим содда. «Ҳа» деганга ишонаверишади. Улар ҳавасда давом этаверишсин, мен унинг ортидан соққа ишлаб оламан»,-ҳою-ҳавасга берилган Ш.И. одамларни чет элга юбориш ваъдаси билан ўзи ташкил этган МЧЖда қинғир хатти-ҳаракатларни бошлади.

Ўзи раҳбарлик қилиб келаётган «WTI» МЧЖ фаолиятини юритиши учун ҳуқуқий ҳужжатлари бўлса-да, Ўзбекистон фуқароларини вақтинчалик меҳнат фаолиятини амалга оширишлари мақсадида чет элга юбориш учун бериладиган лицензияси бўлмаган. Шунга қарамасдан, у одамларни МЧЖ орқали вақтинчалик ишлаш учун Англия давлатига юбориб, яхши ойлик маошли ишга жойлаштириб қўйишига ишонтириб келган. Ҳатто, бу ишга бошқа шахсларни ҳам жалб этиб, улар билан жиноий тил бириктирган. Одамларни алдаш ва ишончини суиистеъмол қилиш йўли орқали катта миқдордаги мулкни қўлга киритишни мақсад қилган. Бухоро шаҳрида жойлашган «Бухоро савдо мажмуаси» биносига ижара шартномаси орқали «ўрнашиб» олган Ш.И. айнан шу манзилда фуқароларни алдаб, йирик миқдордаги маблағларни қўлга киритиб келган. Айниқса, корхонаси пештоқига илинган Англияга ишга жўнатиш ва пул ишлаб топишга чорловчи шиор: «Англияга ишга жойлашинг, пулга эга бўлинг ва Биз билан ҳамкорлик қилинг!» унга қўл келган.

«Ака, олти ойдан ошди. Қачон Англия кетамиз?», «Жўнатсанг жўнат, йўқса, устингдан арз қиламиз» деган иддаолар одамлар норозилигини келтириб чиқишига сабаб бўлган. Шунга қарамасдан, Ш.И. ўзининг жиноий ҳаракатларини давом эттириб, такроран бошқа шахслар билан ҳам жиноий тил бириктириб, салкам 30 минг АҚШ долларига тенг пулларни қўлга киритган.

Йирик маблағни корхона ҳисоб рақамига «ўтказиб» қўйган фуқаро О.Ж. салкам ярим йилдан ортиқ вақтдан бери Англияга кетолмагач, сарсонликка чек қўйган ва ҳуқуқ тартибот идораларига шикоят аризаси билан мурожаат қилган. О.Ж.нинг шикояти ортидан олиб борилган суриштирув ҳаракатлари давомида  «WTI» раҳбарининг одамларни алдаш ва уларнинг ишончини суистеъмол қилиш орқали уларнинг йирик миқдордаги маблағларини қўлга киритиб келаётгани аниқланган. 

«Жами 23 нафар фуқаро жамият раҳбарига «чув» тушган. Суд-тергов ҳаракатлари давомида ёш «ишбилармон»нинг кирдикорлари фош этилди. Ўзбекистон Республикаси Жиноят Кодексининг 168-моддаси (Фирибгарлик), 3-қисмининг «б» банди билан 6 йил муддатга озодликдан маҳрум қилинди»,-дейди Бухоро вилояти суди судьяси Нозимжон Жўраев.