Бугун, 27 май куни «Бунёдкор» стадионида амалдаги мамлакат чемпиони – «Насаф» ва кубок соҳиби – «Андижон» жамоалари ўртасида Суперкубок учун баҳс бўлиб ўтади.

Сўнги йиллардаги мамлакатнинг энг совриндор жамосига айланган «аждарлар» бугун кетма-кет бешинчи йил Суперкубок учун майдонга тушади. Илк бор мамлакат чемпиони сифатида ушбу баҳсда қатнашаётган Бердиев бошчилигидаги «Насаф» бугун қаторасига учинчи бор Суперкубокни ютиш учун уриниб кўради. Шунингдек, Суперкубокларни ютиш бўйича қаршиликлар ҳозирда пешқадам, айни дам амалдаги мамлакат чемпионларида 3 та Суперкубок мавжуд.

Ўтган мавсум Ўзбекистон кубогини ютиб, ўз тарихида илк бор титул қўлга киритган андижонликлар бугун совринлари сонини иккитага етказиб олишга ҳаракат қилади. Водий жамоаси учун ушбу финалнинг яна бир муҳим жиҳати шуки, бу йилги кубок ва чемпионатдаги қониқарсиз натижалар фонида Суперкубок мавсумни соврин билан якунлаш учун ажойиб имконият. Қолаверса, «бургутлар»нинг янги бош мураббийи Максим Шацких учун ҳам бугунги ўйин алоҳида аҳамиятга эга. Чунки мураббий сўнги иккита Суперкубок финалларида айнан «Насаф»га имкониятини бой бериб қўйган. 

Мухлислар билан тўлиши кутилаётган ушбу баҳс бугун Тошкент вақти билан 19:30 да старт олади.