«Ўғри бўл, ғар бўл, нотавон бўлма экан. Турмуш ташвишлари билан ожизалар кучли бўлиб бораётганию айрим эркакларнинг ожизланиб бораётганидан афсусланасан, одам. Ўз аёлининг кийим-кечагини ёққан эркакнинг беўхшов ва бачкана хатти-ҳаракати қишлоғимиз эркаклари ориятига тегди, унинг қилиғини оқламаймиз», -маҳалла фаолининг очиқ сайёр суд мажлисидаги муносабатига маҳалланинг кўплаб эркаклари тараф бўлишди.

Ҳолатга кўра, ҳеч қаерда ишламайдиган Қоракўл туманилик фуқаро М.Ғ. спиртли ичимликлар истеъмол қилишга ружў қўйган. Рўзғор тортишни ҳам уддалай олмай келган бу шахс турмуш ўртоғи билан доимий жанжаллашиб, унга зўравонлик қилиб келган.

Шундай жанжалларнинг бирида хонадонига маст ҳолатда кириб келган эркак бутун маҳаллани бошига кўтарган кўйи турмуш ўртоғини ножўя сўзлар билан ҳақоратлаб,  қўни-қўшниларнинг тинчлиги ва осойишталигини бузган.  Турмуш зарбаларидан чарчаган аёл «ота уйи»га кетишини айтган. Шунда М.Ғ. аёлининг уйига кетмаслиги учун зўрлик ишлатиб, қўрқитиб, унга тегишли бўлган барча кийим ва буюмларни ёқиб юборган. Қўни-қўшнилар етиб келиб, ички ишлар органларига хабар беришган. Бироқ, М.Ғ. воқеа жойига етиб келган ИИБ ходимларининг ҳам қонуний  талабларига бўйсинмай, жамоат тартибини бузган. Безорилик ҳуқуқбузарлигини ҳам содир қилган.

Жиноят ишлари бўйича Қоракўл туман суди раиси Бобораҳим Очиловнинг «Xabar.uz»га маълум қилишича, Ўзбекистон Республикаси МЖтКнинг тегишли қисмлари билан  айбланган М.Ғ.га 5 «сутка» қамоқ жазоси берилган.