Бугун, 30 сентябр куни Дубайдан Тел-Авивга учган Flydubai авиакомпаниясининг Boeing 737 самолёти ҳавода фавқулодда сигнал бериб, кейинчалик самолётга ноқонуний аралашув ёки уни гаровга олиш эҳтимолини англатувчи «7500» кодини узатди. Ҳодиса ортидан Исроил ҳарбий самолётлари ҳавога кўтарилган.

FZ1073 рейси Саудия Арабистони томон йўналишини ўзгартириб, Табук аэропортига хавфсиз қўнди. Бортда 170 нафардан ортиқ йўловчи бўлгани хабар қилинмоқда. Барча йўловчи ва экипаж аъзолари хавфсиз экани айтилган.

Дастлабки хабарларда самолёт гаровга олинган бўлиши мумкинлиги айтилган, бироқ кейинчалик бу маълумот тасдиқланмади. Flydubai авиакомпанияси ҳам самолёт гаровга олингани ҳақидаги хабарларни рад этган.

Исроил ОАВлари хавфли сигналга экипаж аъзолари ўртасидаги можаро сабаб бўлган бўлиши мумкинлигини хабар қилмоқда. Аммо бу версия авиакомпания ёки авиация расмийлари томонидан ҳозирча тўлиқ тасдиқланмаган.

Ҳодисанинг аниқ сабаблари ўрганилмоқда.