Сешанба куни Европа Иттифоқи ташқи ишлар вазирлари яҳудий давлатига қарши бирор чора кўриш бўйича келишувга эриша олишмади. Бироқ Европа Иттифоқи ҳисоботида Исроил томони Исроил-Европа Иттифоқи ассоциацияси келишувининг инсон ҳуқуқлари ва демократик тамойилларга риоя қилиш кераклигига доир 2-моддасини бузганлиги таъкидланган.

«Бу даҳшат. Европа Иттифоқининг янги ҳисоботида Исроил 38 та ҳолат бўйича халқаро ҳуқуқ нормаларини бузаётгани аниқ айтилган. Бу қонунбузарликлар ҳамманинг кўз ўнгида содир бўлмоқда. Ғазода нималар бўлаётганини бутун дунё кўриб турибди. Қотилликлар, ваҳшийликлар, ҳарбий жиноятлар, озиқ-овқатдан қурол сифатида фойдаланиш, бир пакет ун учун навбатда турган одамларнинг ўлдирилиши...», – дейди Варсен Агабекян-Шаҳине Euronews’га берган эксклюзив интевьюсида.

Аввалроқ Европа Иттифоқининг ташқи сиёсат бўйича раҳбари Кая Каллас вазирларга қонунбузарликларга жавобан Исроилга қарши мумкин бўлган санкцияларнинг ўнта вариантини таклиф қилгани айтилган эди.

Вариантлар орасида Исроилнинг Европа Иттифоқининг Horizon Europe тадқиқот дастурига киришини тўхтатиб туриш, чекланган савдо чоралари, қурол-яроғ эмбаргоси ёки Исроил ҳукуматининг Хавфсизлик вазири Итамар Бен-Гвир ва Молия вазири Безалел Смотрич каби экстремистик аъзоларига қарши санкциялар бор.

Смотрич ҳам, Бен-Гвир ҳам Буюк Британия, Норвегия, Канада, Янги Зеландия ва Австралия томонидан «босиб олинган Ғарбий Соҳилдаги Фаластин жамоаларига қарши қайта-қайта зўравонликни қўзғатганликлари» учун санкция остига олинган.

Аммо бу чора-тадбирларнинг ҳеч бири кутилган натижаларни бермаяпти. Бошқа аксарият қарорлар эса барча аъзо давлатларнинг бир овоздан қабул қилишини талаб қилади ва Германия, Австрия, Венгрия ва Чехия Исроилнинг Фаластин ҳудудларидаги ҳарбий кампанияларини доимий равишда танқид қилишдан бош тортиб келган.

Ўтган ҳафта сешанба кунги йиғилиш олдидан ЕИ Исроил билан Ғазога гуманитар ёрдам, жумладан, тиббий буюмлар олиб кетувчи юк машиналари сонини «сезиларли» кўпайтириш бўйича келишувга эришгани маълум қилинган эди.

Каяа Каллас эса сешанба кунги йиғилишда Ғазога кириб келаётган юк машиналари сони билан боғлиқ вазият бироз яхшиланган бўлса-да, бу ҳали ҳам «ҳалокатли» эканини айтди.

Келишувдан кейинги кунларда ёрдам олишга уринган ўнлаб фаластинлик тинч аҳоли, жумладан, болалар ҳалок бўлмоқда. Жумладан, якшанба куни Нусейрат қочқинлар лагеридаги сув тақсимлаш марказида 10 киши, жумладан, олти бола ҳалок бўлган.

«Евроиттифоқи келишувга риоя этилишини қаттиқ назорат қилишидан умидворман. Чунки келишув тузилганидан буён ўтган ҳафтага назар ташласак, кўпроқ одам ўлдирилганини кўрдик. Чодирларда тиббий ёрдам кутаётган болаларнинг ваҳшийларча ўлдирилаётганини кўряпмиз», – деди Фаластин ташқи ишлар вазири.

Агабекян-Шаҳиннинг айтишича, илгари озиқ-овқат ва ёрдам тарқатиш пунктлари сони 300 тага етган бўлса, бугун уларнинг сони тўртта қолган.