Германия миллий терма жамоаси футбол бўйича жаҳон чемпионатида Парагвайга қарши ўйинда пенальтилар баҳсида имкониятни бой бериб, мусобақани барвақт тарк этди. Буни аксар мухлислар «шармандалик» деб атаган. Жамоани қўллаб-қувватлашга уринган мамлакат канцлери Фридрих Мерц ҳам кескин танқидга учради.

«Мусобақадан чиқиб кетиш аламли бўлса-да, лекин ажойиб ўйин бўлди! Ушбу ЖЧда кўрсатган жонбозлигингиз ва жамоавий руҳ билан бутун мамлакатимизни руҳлантирдингиз. Биз сиз билан фахрланамиз», – дея ижтимоий тармоқ орқали миллий термани дастаклаган федерал канцлер Фридрих Мерц.

Ҳукумат раҳбарининг ушбу пости жамоатчиликда кескин эътироз уйғотди. Телебошловчи Оливер Похер канцлернинг ижтимоий тармоқдаги саҳифаси ҳакерлар томонидан бузиб кирилган бўлиши мумкинлигини қайд этиб, ҳозирги вазиятда жамоани мақташ номақбул эканига ишора қилган.   

Похернинг таъкидлашича, мағлубиятни хаспўлаш тўғри эмас, чунки миллий жамоа ўйинлари билан юртдошларни руҳлантиргани йўқ, билъакс Германиянинг юзини шувут қилди.

Мамлакатнинг етакчи нашрларидан бири – Bild газетаси канцлернинг постига шундай муносабат билдирди: «Мерц ўз пости билан ўзини кулгили аҳволга солиб қўйди».

Аксар таҳлилчилар Мерцни сиёсат каби спортни ҳам тушунмасликда айблаган.

«Мен болалигимдан бери Германия терма жамоасига телевизор орқали мухлислик қиламан: жамоамиз доим ярим финалда, финалда ўйнарди. Албатта, бугунги болалар, одамлар ва ҳозирги авлод ҳам шуни хоҳлайди. Аммо биз мухлисларга шундай қувончни тақдим эта олмадик ва бу, айниқса, Германия аҳолисига фахрланиш туйғуси сув билан ҳаводек зарур бўлган ҳозирги паллада жуда аламлидир... Майдонда ўйнаган биз, футболчилар ҳамма нарсани барбод қилдик. Бунга мураббий ҳам, ОАВ ҳам, ҳакам ҳам, рақиб ҳам сабабчи эмас, бунда фақат ва фақат ўзимиз айбдормиз», – дея мағлубият учун жавобгарликни зиммага олди Германия миллий жамоаси сардори Йозуа Киммих.  

Мағлубиятдан кейин жамоа мураббийи Юлиан Нагельсман ҳали шартнома муддати тугамаган экан, мураббийлик фаолиятини давом эттиришини айтган. Бу эса мухлислар ва шарҳловчиларни баттар дарғазаб қилган. Хусусан, Süddeutsche Zeitung газетаси бу йилги жаҳон чемпионатида Эквадор ва Парагвайга имкониятни бой берган Германия терма жамоаси жуда оғир аҳволга тушиб қолгани, барини янгидан бошлаш учун мураббийнинг қўлига паттаси тутқазилиши кераклигини таъкидлаган.

2018 ва 2022 йилги ЖЧларида ҳатто гуруҳдан ҳам чиқа олмаган, бу йил эса 1/16 босқичдаёқ мусобақани тарк этган миллий жамоа кенг жамоатчилик ғазабига нишон бўлмоқда.

Аввал хабар берганимиздек, Германия терма жамоасининг Парагвайга мағлуб бўлиб, ЖЧ-2026ни эрта тарк этиши миллионлаб мухлисларни хафа қилишдан ташқари немис тадбиркорларининг даромадига ҳам салбий таъсир қилган.