Президент Шавкат Мирзиёевнинг 22 декабрдаги Олий Мажлисга йўллаган мурожаатномасидаги танқиддан кейин Молия вазирлиги тизимида катта ўзгаришлар рўй бермоқда.

Собиқ Молия вазири ва Ходимлар бошқармасининг собиқ бошлиғи паноҳида бўлган, ҳанузгача тизимда ишлаб келаётган, молия тизимининг номига доғ тушираётган «каламушлар»ни ҳайдаш юзасидан ҳудудий раҳбарларга қатъий топшириқлар берилган. Бу ҳақда ЎзА хабар берди.

23 декабр куни Тошкент шаҳар давлат молиявий назорати бошқармаси бошлиғи ҳамда унинг 3 нафар ўринбосари эгаллаб турган лавозимидан четлаштирилди. Шундан сўнг, Молия вазирлигининг ҳудудий бошқарма бошлиқлари томонидан жойлардаги молия идораларидан 273 нафар (23 нафари раҳбар ходимлар):

— ғазначилик идораларидан 65 нафар (12 нафари раҳбар ходим);

— пенсия жамғармасидан 100 нафар (1 нафари раҳбар ходим);

— Давлат молиявий назорати бошқармалари ходимларидан 100 нафари (4 нафари раҳбар ходим), жами молия тизими бўйича 562 нафар давлат идораси номига доғ туширган ходимлар ўз лавозимидан озод этилди.

Молия вазирлиги тизимидаги вакант иш ўринларини инновацион ғоя ва фикрга эга, замонавий технологияларни яхши ўзлаштирган, иқтидорли ёшлар билан тўлдириш мақсадида Ўзбекистон Республикаси ёшлар иттифоқи ҳамда иқтисодий йўналишдаги олий ўқув юртларига мурожаатлар юборилди.