Немис шифокори ва ишбилармон Винфрид Штоккер коронавирусга қарши вакцина яратиш тажрибалари учун судга берилди. Бу ҳақда МDR телеканалига Любек прокуратураси вакили хабар берган.

Ўз лабораториясига эга бўлган 74 ёшли Görlitz универмаги эгаси ушбу препаратни 2020 йил баҳорида ихтиро қилади. Сўнгра уни ўзи ва бошқаларга рухсатсиз синаб кўришни бошлаган. Март ва апрель ойларида Штоккер сон мушакларини тўрт марта эмлаш қилганини айтди. Шундан сўнг, у ушбу моддани рафиқаси, болалари ва бошқа 65 нафар кўнгиллида синовдан ўтказган. У синовлар иштирокчиларининг ҳеч бири ножўя таъсирларга эга эмаслиги ҳақида айтиб ўтган. Фақат инъекция жойида озгина оғриқ пайдо бўлган, натижада барчада антитаначалар пайдо бўлган.

Ўз блогида тадбиркор вакцинани тайёрлаш ва сақлаш осон эканлигини таъкидлаб, унинг рецептини жойлаштирган. У ўзининг дори-дармонлари ёрдамида бутун Германияни бир неча ой ичида «коронавирусдан тозалашни» таклиф қилган. Вакцинанинг 95 фоиз самарадорлиги айтилган.

2020 йил сентябрь ойида у ўз топилмалари тўғрисида вакциналарни рўйхатдан ўтказиш учун масъул Паул Эрлих институтига хабар бериб, дори самарадорлигини тасдиқлаш учун кўпроқ синовларни ўтказишни сўраган. Бироқ, олимлар прокуратурага мурожаат қилишади. Унга қарши дори-дармон ишлаб чиқариш тўғрисидаги қонунни бузганликда гумон қилиниб, жиноий иш қўзғатилади.

Штоккер таниқли ҳуқуқшунос, сиёсатчи ва 2018 йилдан бери Бундестаг раисининг ўринбосари сифатида ишлаб келаётган Вольфганг Кубиккига мурожаат қилган. Унинг сўзларига кўра, шифокор препаратнинг клиник синовларини ўтказмаган, аммо ўз-ўзини даволашда ишлатгани учун рухсат керак бўлмаган.

Штоккер 1987 йилда аутоиммун ва юқумли касалликларни келиб чиқиш сабабларини ўрганувчи «Euroimmun» компаниясига асос солган. Компаниянинг ҳозирда 17 мамлакатда ваколатхоналари мавжуд. 2017 йилда Штоккер «Euroimmun»ни Америка концернига 1,2 миллиард еврога сотган.