Айрим қонун ҳужжатларига ногиронлиги бўлган шахсларнинг бошқа фуқаролар билан ҳуқуқий жиҳатдан тенглигига, одил судловдан фойдаланишга, сайланишга, шунингдек таълим олишга, бадиий ижод эркинлигига бўлган ҳуқуқларини таъминлаш учун қўшимча шарт-шароитлар яратилишини ҳамда ногиронлиги бўлган шахсларни камситганлик учун жавобгарликни назарда тутувчи тегишли қонун лойиҳаси ишлаб чиқилди.

Мазкур ҳужжат билан Жиноят кодекси 141-4-модда билан (Ногиронлик белгисига кўра камситиш) тўлдирилади.

Бунда шахсни ногиронлик белгисига кўра камситиш, яъни мақсади ёки натижаси сиёсий, иқтисодий, ижтимоий, маданий, фуқаровий соҳада ёки бошқа соҳада ўзгалар билан ногиронлиги бўлган шахсларнинг тенг ҳуқуқ ва эркинликларини эътироф этишни ёки рўёбга чиқаришни инкор қилишдан иборат бўлган, ногиронлик сабабли ҳар қандай ажратиб қўйиш, истисно этиш, четлатиш, чеклаш, шундай қилмиш учун маъмурий жазо қўлланилганидан кейин содир этилган бўлса, БҲМнинг эллик бараваригача миқдорда жарима ёки уч йилгача муайян ҳуқуқдан маҳрум қилиш ёхуд уч юз соатгача мажбурий жамоат ишлари ёки икки йилгача ахлоқ тузатиш ишлари билан жазоланади.

Ўша ҳаракатлар:

а) оғир оқибатларга олиб келган бўлса;

б) ғаразли ниятларда содир этилган бўлса;

в) зўрлик ишлатиб содир этилган бўлса;

г) хавфли рецидивист томонидан содир этилган бўлса, уч юз соатдан уч юз олтмиш соатгача мажбурий жамоат ишлари ёки икки йилдан уч йилгача ахлоқ тузатиш ишлари ёхуд бир йилдан уч йилгача озодликни чеклаш ёки уч йилгача озодликдан маҳрум қилиш билан жазоланади.