Душанба куни Манхеттен марказидаги офис биносида қуролли шахс томонидан отишма содир этилди. Натижада камида беш киши, жумладан, нафақадаги полициячи ҳалок бўлди.

Гумонланувчи Невада штатидан Шейн Тамура эканлиги аниқланган. Полиция у ўзини ўлдирганини айтди.

Агентлик маълумотларига кўра, Тамура бинога М4 автомати билан кириб келган ва у ерда ўқ узишни бошлаган, натижада собиқ полициячи ва уч киши ҳалок бўлган. Кейин у Ruden Building Management жойлашган қаватга кўтарилиб, бир аёлни ўлдирган. 6 киши эса оғир яраланган.

«Шундан сўнг Тамура бинонинг қабулхонасига қайтиб келиб, ўз жонига қасд қилди. 27 ёшли қуролланган шахс Лас-Вегасда яшаган ва яширин қурол олиб юриш учун лицензияга эга эди», –деди Нью-Йорк полицияси комиссари Жессика Тиш. Унинг айтишича, ҳужумчи руҳий касалликдан азият чеккан.

Фожиа содир бўлган осмонўпар бино Марказий боғдан бир неча блок нарида, гавжум Мидтоун ҳудудида жойлашган. Унда мамлакатнинг етакчи молиявий фирмалари, жумладан, Blackstone ва KPMG, Ирландия консуллиги ва Миллий футбол лигасининг штаб-квартираси жойлашган.