Туризм қўмитаси томонидан юртимизнинг туризм соҳаси тадбиркорлик субъектлари ва оммавий ахборот воситалари вакиллари иштирокида «Очиқ мулоқот» шаклида учрашув ташкил этилди.

Учрашувда Туризм қўмитаси раҳбарияти, вазирлик ва идораларнинг масъул ходимлари, қўмита бошқарма/бўлим бошлиқлари, вилоят ҳокимликларининг туризм масалалари бўйича ўринбосарлари ва ҳудудий туризм бошқарма ходимлари иштирок этди.

Очиқ мулоқот шаклида ўтказилган учрашувда 2024 йилда туризм соҳасида амалга оширилган ишлар, эришилган натижаларни ҳамда 2025 йилдаги устувор вазифалар, шунингдек, мамлакатимизга хорижий сайёҳларни жалб этиш, саёҳат сафарларини ташкил этиш жараёнида туроператорлар дуч келаётган муаммолар ва уларнинг ечими юзасидан таклифлар тингланди.

Тадбирда янграган рақамлар ҳақида:

1. 2024 йил давомида жами туризм ва бошқа мақсадларда 10,2 миллион нафар хорижий сайёҳлар ташриф буюрди.

2. Сайёҳларга кўрсатилган туризм хизматлари экспорти 3,5 миллиард долларни ташкил этди. Ушбу кўрсаткичлар ўтган йилнинг мос даврига нисбатан 1,5 баробарга ўсди.

3. Қўшни давлатлардан сайёҳлар сони 2023 йилга нисбатан 1,6 баробар, қолган МДҲ мамлакатларидан 23,7 фоиз ошган бўлса, узоқ хориж давлатларидан 1,5 баробарга кўпайди.

4. «Ўзбекистон бўйлаб саёҳат қил!» дастури доирасида ҳудудлар бўйлаб аҳолининг 22,7 миллион нафар ташрифлари амалга оширилди.

5. Ижтимоий кўмак сифатида 18,1 минг нафарга яқин имконияти чекланган шахслар ва 6,3 миллион нафар ёшлар саёҳатлари ташкил этилди.

6. Туризм ва унга ёндош соҳалар йўналишида 51,0 мингга яқин янги иш ўринлари яратилди.

7. Ҳудудларда 124 та янги меҳмонхона (янги ўринлар сони 6,4 мингта) ва 239 та хостел (янги ўринлар сони 7,6 мингта)лар фаолияти йўлга қўйилиб, жами жойлаштириш объектлари сони 6,1 мингтадан, улардаги ўринлар сони 161 мингдан ошди.

8. 352 та оилавий меҳмон уйлари (янги ўринлар сони 3,2 мингта) ташкил қилиниб, уларнинг умумий сони 3 752 тага ўринлар сони 33,5 мингтага етди.

9. Туристлар учун хизмат кўрсатувчи 866 та янги туристик ташкилот ва турагентлар фаолияти йўлга қўйилиши натижасида уларнинг сони 3 686 тага етди. Республика бўйлаб 3 200 та гид-экскурсоводлар фаолият олиб бормоқда, жорий йилнинг ўзида 700 нафар гид-экскурсоводлар тайёрланди.

10. Ўзбекистон туризм салоҳиятини Европа, Шимолий Америка, Осиё-Тинч океани, Яқин Шарқ, Хитой ва Марказий Осиё минтақаларида кенг тарғиб қилиш мақсадида «World Media Group» ва «Blue Sky», «Sky one», «Wanderlust», «Euronews», «BBC», «National Geographic», «CNN» «Travel Tomorrow», «Warner Bros. Discovery», «Saga travel Group» халқаро медиакорпорациялари, шунингдек, «Ctrip.com», «Holiday factory», «Voyage Prive» онлайн саёҳат платформаси каби бир қатор хорижий ташкилотлар ва телевидениелар билан шартномалар асосида халқаро миқёсда мамлакатимиз имижи илгари сурилди.

11. 2024 йилда дунёнинг етакчи 19 та мамлакатида бўлиб ўтган 22 та халқаро ярмаркаларда Ўзбекистоннинг миллий туризм стенди билан иштирок этилди.

12. 12 та хорижий давлатларда «Road show», маданий ва тақдимот тадбирлари ўтказилди. Япония, Германия, Хитой ва АҚШ давлатларида Ўзбекистоннинг туризм бренди элчилари ва вакиллари тайинланди.

Бундан ташқари:

2024 йилнинг 21-23 ноябрь кунлари Ўзбекистон ва бутун Марказий Осиё минтақаси туризм саноатининг энг ёрқин ва йирик тадбири – «Ипак йўлида туризм» Тошкент халқаро туризм ярмаркаси бўлиб ўтди. Ярмаркага 20 мингдан ортиқ киши ташриф буюрди ва улар Ўзбекистон Республикасининг 14 ҳудудидаги янги манзилларнинг туризм салоҳиятига баҳо бериш имконига эга бўлдилар. Бундан ташқари, Ярмарка доирасида «Б2Б» учрашувлар ташкил этилиб, уларда 20 мингдан ортиқ музокаралар олиб борилди ва 8 мингдан ортиқ битимлар имзоланди.

2024 йил давомида 591 та лойиҳалар амалга оширилиб 19 428 та янги иш ўринлари яратилди. Тошкент шаҳрида Azimut, Bentley, Bill Wyndham & Co, Термиз шаҳрида 4 юлдузли «Hilton Garden Inn Termez Airitom», Навоий шаҳрида «Dedeman Hotel», Самарқанд туризм марказида «Hilton Samarkand Regency», «Hilton Garden Inn Samarkand Sogd», «Intercontinental» меҳмонхоналар брендлари остида ташкил этилди.

Ўтган йилнинг 25-26 апрель кунлари «Шаҳрисабз – Иқтисодий ҳамкорлик ташкилотининг туризм пойтахти» халқаро форуми ва «Хива – 2024 йилда ислом дунёсининг туризм пойтахти» шиори остида 2024 йил 31 май – 2 июнь кунлари Хива шаҳрида Ислом ҳамкорлик ташкилотига аъзо давлатлар туризм вазирлари ХII йиғилиши тадбирлари юқори савияда ўтказилди.
2024 йил давомида 20 дан ортиқ давлатлардан 100 дан зиёд хорижий ОАВ вакиллари, блогерлар ва инфлюенсерлар учун Ўзбекистон бўйлаб 26 та инфо ва пресс-турлар ташкил қилинди.

Туризм қўмитаси томонидан ишлаб чиқилган 22 та норматив-ҳуқуқий ҳужжат, шундан 3 та Президент Фармони, 8 та Президент қарори ва 11 та Ҳукумат қарорлари белгиланган тартибда тасдиқланди.

Бутунжаҳон туризм ташкилоти Ўзбекистонни туризм хизматларидан тушган тушумлар (экспорт) бўйича дунё бўйлаб «иккинчи энг яхши йўналиш» сифатида кўрсатди.

Жаҳон Иқтисодий форуми томонидан эълон қилинган «Саёҳат ва туризмни ривожлантириш индекси» тадқиқотига кўра, Ўзбекистон 2024 йилда «Туризмни ривожлантириш бўйича дунёнинг энг фаол мамлакати» деб топилди. Бу эътироф мамлакатда халқаро сайёҳларни жалб қилиш ва барқарор туризмни ривожлантиришга эътибор кучайиб бораётганини билдиради.

Лондонда бўлиб ўтган маросимда Ўзбекистон нуфузли «Wanderlust Reader Travel Awards 2024» мукофотининг «Энг яхши ривожланаётган йўналиш» номинациясида ғолиб бўлди.

«Trip.com» халқаро онлайн сайёҳлик платформаси томонидан БААнинг Абу-Даби шаҳрида ўтказилган «Глобал Травел» форумида Туризм қўмитаси «Энг яхши ҳамкор» ва «Энг яхши туризм макони» номинацияларида ғолиб деб топилди.