Перуда сиёсий инқироз давом этмоқда ва энг сўнгги янгиликларга кўра, мамлакатда яна бир бор президент алмашди. The New York Times ёзишича, мамлакат Конгресси муваққат президент Хосе Херига нисбатан импичмент эълон қилди ва уни лавозимидан четлаштирди.

Президент Хери хитойлик тадбиркорлар билан яширин учрашувлар ўтказгани ва бу ҳақда ҳисобот бермагани учун айбланган. Бу можаро ОАВда «Чифагейт» (Chifagate), дея ном олди.

Конгресснинг 75 нафар аъзоси импичмент учун овоз берди, қаршилар — 24 нафар.

Маълумот учун: Хосе Хери бор-йўғи 4 ой президентлик қилди. У 2025 йил октябр ойида аввалги президент Дина Болуарте импичмент қилиниб, лавозимидан четлатилганидан сўнг ҳокимиятга келган эди.

Перуда навбатдаги умумий сайлов 2026 йил 12 апрел кунига белгиланган. Ҳозирда Конгресс янги муваққат раҳбарни сайлаши кутилмоқда.

Эътиборли жиҳати, сўнгги 10 йил ичида Перуда сакизинчи президент муддатидан олдин лавзомидан кетди, бу эса мамлакатдаги кучли сиёсий беқарорликни ифодалайди.