Россия президенти Владимир Путин мамлакат Европа давлатлари билан уруш қилиш ниятида эмаслигини айтди. Лекин Европа уруш бошласа, Россия бунга тайёр, дейди у.

«Россия Европа давлатлари билан уруш бошлаш ниятида эмас, лекин Европа уруш бошласа, Россия ҳозир тайёр», — деди президент.

Путин, шунингдек, Европа Украина учун тинчлик режаси бўйича Россия учун қабул қилиб бўлмайдиган таклифларни илгари сураётганини таъкидлади. Россия раҳбарининг сўзларига кўра, Европа Иттифоқи давлатлари айни дамда тинчлик жараёнидан чиқиб кетган, можарони чўзишга аҳд қилган ва бошқа нарсалар қатори АҚШ президенти Доналд Трампнинг келишув режасига аралашмоқда.

2 декабр куни Венгрия ташқи ишлар вазири Петер Сийярто Европа Иттифоқи (ЕИ) Россия билан урушга тайёрланаётганини маълум қилди. У алянснинг 2029 йилгача тўлиқ жанговар шайликка эришиши кераклиги кўрсатилган стратегик ҳужжатларини келтириб ўтди. Вазирнинг айтишича, бу Европа ва Россия ўртасида 2030 йилда уруш бошланишига имкон беради.

Ноябрь ойи охирида Сийярто Европа Иттифоқини Россия ва Украина ўртасидаги тинчлик келишувини яна бир бор бузишни режалаштиришда айблаганди. Унинг фикрича, Европа давлатларининг барча сиёсатчилари АҚШ тинчлик режасини сўзсиз қўллаб-қувватлашлари керак, чунки бу позиция «инсонпарварлик ва соғлом фикр» тамойилларига мос келади.