Қозоғистон Украинага гуманитар ёрдам юбормоқда. Бу ҳақда мамлакат соғлиқни сақлаш вазирлиги хабар берди.

Асосан дори-дармондан иборат дастлабки гуманитар кўмак Олмаота аэропортидан 14 март куни жўнатилди. Шунингдек, 15 март куни ҳам ёрдам йўлланиши кутилмоқда. Ҳозирча Қозоғистон томонидан Украинага ажратилган гуманитар кўмак ҳажми 28,2 тоннани ташкил этади.

Уруш кечаётган мамлакат халқига аталган дори-дармонни хавфсиз етказиш учун қўшни давлатлар билан келишувга эришилган. Олмаотадан парвоз қилган самолёт Польшанинг Катовице шаҳрида қўнади ва гуманитар кўмак тегишли йўналишда етказилади.

Қайд этилишича, Украина томони кўмак сўраб Қозоғистонга мурожаат қилган ва президент Қосим-Жўмарт Тўқаев сўровни рад этмаслик ҳақида топшириқ берган. Халқаро гуманитар кўмак бўйича комиссия ҳам украиналиклар кўмак бериш ҳақида қарор қабул қилган.

Аввалроқ Қозоғистон раҳбари Қосим-Жўмарт Тўқаев Германия президенти Франк-Вальтер Штайнмайер билан телефон орқали мулоқотда Украинада вазият мураккаб эканини қайд этиб, ҳозирги вазиятда БМТ низом ва меъёрларига қатъий риоя қилиши кераклигини таъкидлаган эди.

Қ.Тўқаев Украинанинг тинч аҳолиси ва инфратузилмасига зарар етказишни тўхтатиш, зиддиятни дипломатик йўли билан ҳал этиш муҳимлигини ҳам айтган эди. Ўзаро мулоқотда Қозоғистон Украинага гуманитар кўмак йўллашга тайёр экани ҳам билдирилганди.