Қозоғистонда «Ўлмас полк» акцияси атрофида жанжал юзага келди. Расмийлар бу юришларни рухсатсиз митинг деб баҳолаб, иштирокчиларга жарима ва ҳибсга олиш билан таҳдид қилмоқда.

Расмийлар шаҳарларда бўш жой йўқлигини важ қилиб, юришлар ноқонуний эканини айтмоқда. Асосан рус тилида сўзлашувчи Павлодар ва Петропавловскда расмийлар акцияни интернетда ўтказишни ва фронтчиларнинг фотосуратларини махсус LED экранларга жойлаштиришни таклиф қилган.

Олмаоталик фаоллар президент Токаевга мурожаат қилиб, «ғалаба меросхўрлари» сифатида юриш ўтказишга рухсат сўрашди. Улар совет рамзларида ёмонлик йўқлигини таъкидлади.

Баъзи шаҳарларда, россиялик кўнгиллилар аҳолига пул эвазига акцияда қатнашишни таклиф қилгани ҳақида хабарлар тарқалди. Баннерларда эса урушдаги ғалаба фақат «руслар» ҳиссасига ёзилган, бошқа миллатлар тилга олинмаган. Бу эса жамоатчилик ва депутатларнинг кескин танқидига сабаб бўлди.

Шунингдек, ҳарбий парадлар баъзи шаҳарларда бекор қилинган бўлса-да, Остона майдонида ҳарбий техника юриши бўлиб ўтади.