Исландиянинг собиқ президенти Гвюдни Йоханнессон мамлакатдаги Тингведлир миллий паркида экскурсовод сифатида иш бошлади. 56 ёшли сиёсатчи 2016-2024 йилларда Исландияга раҳбарлик қилган.

“Iceland Mirror” газетасининг ёзишича, Гвюдни Йоханнессон 2024 йилнинг ёзида, президентликдан кетиш арафасида Тингведлир паркига ташриф буюрган.

Паркнинг масъул ходими билан суҳбат асносида у президентликдан кетгач, иш топиши лозимлигидан гап очган. Парк ходими унга миллий паркда ишлашни таклиф қилган. Шу тариқа собиқ президент гид сифатида ишлашга қарор қилган.

Гвюдни Йоханнессон миллий паркдаги фаолиятини давлат хизматининг давоми деб ҳисоблайди.

“Исландия ва ушбу парк тарихи ҳақида меҳмонларга ҳикоя қилиш бериш мен учун шарафли вазифадир. Меҳмонларнинг аксари мени танимайди ҳам ва бу менга маъқул”, – дейди собиқ президент.

BBC’га кўра, собиқ президент гид сифатида меҳмонларга миллий парк ҳақида сўзлаб беради. Шунингдек, фавқулодда вазиятларда илк тиббий ёрдам кўрсатиш ва жамоат ҳожатхонаси тозалигига қараш ҳам унинг мажбуриятлари сирасига киради.

Йоханнессон, шунингдек, экскурсоводликка қўшимча равишда Исландия университетида кичик профессор лавозимида ҳам фаолият юритади.

Маълумот ўрнида: Шимолий Европада жойлашган Исландия демократия ва тенглик бўйича рейтингларда анъанавий равишда юқори ўринларни эгаллаб келади.