«Менинг ёшим ўттизда. Беш яшар ўғлим бор. Эрим билан ажрашганман. Иккинчи марта турмушга чиққим келмайди. Чунки эркак зотини ёмон кўриб қолганман. Улар турмуш қуришга таклифлар билдирса, асабийлашиб кетаман. Аммо кейин сиқилиб юраман... Нима қилай? С.Б.»

Бу аёлнинг миясида биринчи оиласидан салбий фикр қолиб, турмуш ўртоғидан рози бўлмаган. «Мен ҳақман, эрим ноҳақ» деган тушунча билан ажрашган. Токи у собиқ умр йўлдошини кечириб, юрагидан гиналарни чиқармагунича иккинчи инсонга қалбини оча олмайди. Собиқ эридан рози бўлиб, яхшими-ёмонми, биргаликда ўтказган ҳар бир куни, ўртада туғилган фарзанди учун миннатдор бўлиши керак.

Ахир бу аёл ўзи ёмон дейдиган инсоннинг фарзандини яхши кўриб вояга етказяпти, шундай эмасми?! Юрагида сақлаб келаётган нафратдан қутулиш йўлларини изласин. Норозилик давом этаверса, иккинчи бор турмуш қурган тақдирда ҳам бахтли ҳаёт кечира олмайди. Биринчи оиласидан ажрашишдан мақсади бахтли бўлиш эди-ку, тўғрими?

Майли, сиз турмушда бахтсиз бўлмагандирсиз, эрингиз билан бир-бирингизни тушунмагандирсиз, демак, ажралиб янада чиройли, мазмунли яшашни ният қилгансиз. Шундай экан, илк турмушингиз бахтингиз эмаслигини тан олиб, фақат рози бўлиб кетишингиз, ўртадаги совуқчиликни бартараф этишингиз керак.

Тўғри, сиз собиқ эрингизнинг ҳузурига бориб, рози-ризочилик сўрай олмаслигингиз мумкин. Аммо бу ишни қалбингиз, хаёлингизда амалга оширсангиз бўлади. Сиз ич-ичингиздан унга бахт тиланг. Мен толе ато этмагандирман, эримнинг йўлини тўсгандирман, деб йўл беринг. У нотўғри иш тутган, лекин менинг ҳам адашган жойларим бордир, айб қилгандирман, денг. Собиқ эрингизга бахт тиланг, ана шунда йўлингиз очилиб, Худо сизга истаган жуфтингизни ато этади.

Ҳар бир инсоннинг ўз ҳақиқати бор. Жуфтликларнинг ана шу ҳақиқатлари бир-бирига мос келсагина улар бахтли ҳаёт кечиришади.

Яна бир маслаҳатим: ҳеч қачон ҳаётда ёлғиз ўтаман деманг, зеро, ёлғизлик фақат Яратганга хос. Бундай фикрлаб, сиз аслида ҳаёт ҳақиқатига қарши чиқаётганингизни ҳам унутманг.

Дарвоқе, «Эркакларнинг ҳаммаси ёмон, мен зўрман», деб манманликни ошириб юборманг. Шуни ёдда тутингки, айнан ўша «мен» ҳиссини синдириш учун ҳам баъзи аёлларга жоҳил, баджаҳл эрлар учрайди. Аёл ёшроқ бўлган пайтда турмушини тиклаб олгани маъқул, улғайган сари бу жараён мураккаблашиб кетаверади. Фақат олдинги хатолари нимада эканлигини англаб етсин. Акс ҳолда кейинги турмушида ҳам ўша хатоларга йўл қўяверади.

«Гўзал ҳаёт тилсими» китобидан олинди