Таиланднинг энг ёш бош вазири лавозимидан вақтинча четлатилди

Таиланд бош вазири Пхэтхонгтхан Чиннават 1 июл куни вақтинча лавозимидан четлатилди. Чиннаватнинг Камбоджа бош вазири Хун Сен билан телефондаги мулоқотидан норози бир гуруҳ сенаторларнинг петициясидан сўнг Конституцион суд шундай қарорга келди.
Петиция кўриб чиқилиш даврида Чиннаватнинг Вазирлар маҳкамасидаги Маданият вазири лавозими сақланиб қолади.
Икки мамлакат ўртасида зиддият келиб чиққач, Чиннават ва Хун Сен ўртасида таржимонлар иштирокида телефонда мулоқот бўлиб ўтган.
Суҳбат давомида таиландлик бош вазир камбоджалик ҳамкасбига худди «амакиси» каби мурожаат қилган ва нима истаса «ташкил қилиш»ни таклиф этган. Қолаверса, Чиннават ўз мамлакати ҳарбийлари шаънига ҳам яхши гаплар айтмаган.
Эслатиб ўтамиз, икки мамлакат чегарасидаги отишмада камбоджалик аскар ҳалок бўлган.
Бош вазирнинг рақибга ён босиши ҳам ҳукмрон партия, ҳам мухолифатдагиларнинг жаҳлини чиқарди. 28 июн куни Бангкокдаги намойишда одамлар Чиннаватни истеъфога чиқаришни талаб қилишди.
38 ёшли Пхэтхонгтхан Чиннават — Таиланд тарихидаги энг ёш ҳамда аммаси Йинглак Чинаватдан кейин иккинчи аёл бош вазир, ўтган йили сайланган. У Чулалонгкорн университети сиёсий фанлар факултетида социология ва антропология бакалаври даражасини олган, сўнгра Британиянинг Суррей университетида «халқаро меҳмонхона бизнеси» мутахассиси дипломини қўлга киритган.
Чиннават профессионал фаолиятининг катта қисми оиласининг меҳмонхоналардан тортиб телекоммуникацияларгача бўлган улкан бизнес-империяси билан боғлиқ.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter