Туркия мухолифати мамлакатнинг амалдаги президенти Ражаб Тоййиб Эрдўғон устидан шикоят қилди. Улар ундан бўлажак президентлик сайловларида ўз номзодини қўйишдан воз кечишни талаб қилмоқда.

Deutsche Welle хабарига кўра, партия аъзолари Эрдўғон номзодининг илгари сурилиши Конституцияни бузиш, деб ҳисоблашмоқда, чунки у икки марта мамлакат президенти этиб сайланган. 2014 ва 2018 йиллардаги президентлик сайловларида ғалаба қозонган Эрдўғон Туркия парламенти муддатидан олдин сайловлар эълон қилган тақдирдагина учинчи марта номзодини қўйиш ҳуқуқига эга бўлади, дея таъкидлайди мухолифатчилар. Аммо 14 май куни бўлиб ўтадиган сайловлар президент фармони билан белгиланган.

Ҳуқуқшунослар қонун нормалари Эрдўғонга яна номзодини қўйишга имкон берадими ёки йўқлиги борасида бир фикрга келмаган. Бу йилги сайловларда Туркия президентлигига номзодларнинг якуний рўйхати 31 март куни эълон қилиниши кутилмоқда.

Туркияда бўлиб ўтадиган президентлик сайловларига ҳозиргача тўрт нафар номзод қабул қилинган. Эрдўғондан ташқари давлат раҳбари лавозимига Камол Қиличдорўғли, Муҳаррем Инже ва Синан Ўған номзод бўлди.