Трамп Канада ва Мексикага «уруш очди»

АҚШ бугун, 1 февралдан Канада ва Мексикадан келаётган товарларга бож тўловини 25 фоизга оширмоқда, деб хабар берди AP агентлиги.
Президент Доналд Трамп бу қарорини қўшни давлатлар билан савдо дефицитини қисқартириш ва ноқонуний миграция ҳамда наркотик моддалар савдосига қарши кураш мақсадлари билан асослаган.
Янги тартиб доирасида, шунингдек, Хитойдан келтириладиган маҳсулотларга бож тўлови 10 фоизга оширилади.
Канада бош вазири Жастин Трюдо Трамп тарифларни оширса, жавоб чоралари кўрилишини маълум қилган.
Мексика президенти Клаудия Шейнбаум Трамп жамоаси билан музокара олиб борилганини қайд этиб, захира режалар мавжудлиги, Мексика халқи ўз қадр-қиммати поймол этилишига йўл қўймаслигини таъкидлаган.
Таҳлилчилар бож-хирож ошиши нафақат Канада ва Мексика, АҚШ учун ҳам иқтисодий, сиёсий қалтислик туғдиришини айтмоқда. Хусусан, бу ҳолат АҚШ энергетика, автомобил, ўрмон ва қишлоқ хўжалиги секторларида нарх ошишига сабаб бўлиши мумкин.
Демократик партия вакили, сенатор Чак Шумер ҳам Трампни Хитой каби рақиблар билан курашиш ўрнига Канада, Мексика сингари иттифоқчиларга ҳамла қилаётгани сабаб танқид қилган.
АҚШ Канададан кунига 4,6 млн баррел, Мексикадан эса 563 минг баррел нефт сотиб олади. Агар бож ошиши нефтга ҳам татбиқ этилса, у ҳолда Қўшма Штатлар фуқаролари нарх ошишини ўз танасида яхшигина ҳис қилади.
Шу каби омилларга кўра The Wall Street Journal нашри Трамп томонидан Канада ва Мексикага бож миқдори оширилишини «Тарихдаги энг аҳмоқона савдо уруши» деб атади.
АҚШда илмий фаолият юритиб келаётган ўзбекистонлик иқтисодчи олим Ботир Қобилов ҳам Трамп маъмуриятининг бу қарорини «америкалик истеъмолчиларни жазолаш» деб баҳолади.
«Трамп дўстона мамлакатларни фиктив сабабларни деб қўрқитиш ва уларни нимадир қилишга мажбур қилиш учун америкалик истеъмолчиларни жазолаяпти. Помидор, авокадо, кондиционер, юк машиналари, нефт, автомобил қисмлари, ўйинчоқлар ва ҳоказо минглаб товарларнинг катта қисми айнан шу мамлакатлардан келади. Бугун унинг юзига қараб, менимча, биринчи марта «Жаноб, тарифларни биз АҚШлик истеъмолчилар тўлаймиз-ку, бу эса сиз ваъда қилган истеъмол харажатларни тушириш эмас, аксинча оширади-ку» деб сўрашибди... Хуллас, ақл бовар қилмайдиган даражада аҳмоқлик. Бу эса президентликнинг бор йўғи 11-куни», — деб ёзди бир муддат аввал Ҳарвард университетида докторлик диссертациясини ҳимоя қилган Ботир Қобилов.
Айни чоғда эксперт президент Трампнинг Мексика ва Канадага доир янги фармони судда бекор қилинишини ҳам истисно этмаган.
Трамп Канада ва Мексика билан дипломатик жабҳада ҳам ўзига хос уруш олиб бормоқда. У ҳозирга қадар бир неча марта Канадага Американинг 51-штати бўлишни очиқ таклиф этди, ушбу давлат бош вазири Жастин Трюдони ҳатто «губернатор» деб таҳқирлади.
Трамп Мексика кўрфазини «Америка кўрфази» деб ўзгартирди.
Оқ уйнинг янги маъмурияти ўтган ҳафта «ноқонуний иммиграцияни назорат қилиш учун» Мексика чегарасига минглаб аскар юборилишини маълум қилди. Трамп президент сифатида илк фармонларидан бири орқали Мексика билан чегарада фавқулодда ҳолат эълон қилди, ушбу давлат билан чегара девори қурилишини қайтадан бошлашни буюрди.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter