Тошкент шаҳридаги «ММФИ» Миллий тадқиқот ядро университети филиали битирувчи талаба қизлари Халқаро атом энергияси агентлиги (МАГАТЭ) томонидан тақдим этиладиган Мария Склодовская-Кюри номидаги стипендия дастури ғолиблари қаторига кирди. Мазкур дастур ядро соҳаси бўйича энг нуфузли халқаро таълим грантларидан бири ҳисобланади. Стипендия ядро физикаси, муҳандислик ва шу каби техник йўналишларда таҳсил олаётган талаба қизлар учун мўлжалланган.

Филиал матбуот маркази маълумотига кўра, сўнгги икки йилда МАГАТЭ стипендиясига сазовор бўлган ўзбекистонликлар орасида Анна Зубкова, Ҳулкар Рашидова, Дилфуза Тожибаева ва Сарвина Аҳророва каби талабалар бор. Ҳар бир стипендиат ўз йўлини босиб ўтган. Масалан, Ҳулкар Рашидова филиалда бакалавриатни тамомлагандан сўнг, Хитойнинг етакчи техник университетларидан бири — Цинхуа университетида магистратурага ўқишга кирди. Анна Зубкова ҳозирда «Ядро энергетикаси ва иссиқлик физикаси» йўналиши бўйича ММФИ МТЯУнинг Москвадаги бош кампусида таҳсил олмоқда. Бу университет ядро таълими ва технологиялари бўйича дунёдаги етакчи беш олийгоҳ қаторига киради. Сарвина Аҳророва эса Франциядаги Политехник институти магистратурасида таҳсилни давом эттирмоқда.

– Мактабда физика ва математика менга жуда ёқарди. Шунинг учун аниқ фанлар бўйича ўқишни давом эттиришни истадим. Техник университетлар ҳақида излана бошладим. Айни пайтда юртимизда атом энергетикаси ривожлана бошлади, АЭС қурилиши режалаштирилди ва Тошкентда ММФИ МТЯУ филиали очилди. Шунда мен бу соҳада ишлашни хоҳлашимни англадим – бу мен учун янги ва қизиқ йўналиш эди. «Ядро физикаси ва технологиялари» бўйича бакалавр даражасини олгач, магистратурада ўқишни давом эттиришга қарор қилдим, – дейди Анна Зубкова.

Унинг сўзларига кўра, МАГАТЭ стипендияси унга таълим ва касбий ривожланишга тўлиқ эътибор қаратиш имконини берди. У ушбу маблағни ўқув ресурслари ва малака ошириш курсларига йўналтиришни режалаштирмоқда.

МАГАТЭ маълумотларига кўра, 2020 йилдан бошлаб 2024 йил май ойигача мазкур дастур учун 2271 та ариза қабул қилинган. Шулардан 121 аъзо давлат ва 72 мамлакатда таҳсил олаётган 560 нафар талаба қиз саралаб олинган.

Стипендияга даъвогар бўлиш учун талаба магистратура босқичида ядро соҳасида таҳсил олаётган бўлиши лозим. Ариза топшириш учун мотивацион хат, тавсияномалар, таълим ва ютуқлар ҳақидаги маълумотлардан иборат ҳужжатлар тўпламини тайёрлаш талаб этилади.

– Ариза топширишда кераклиси – магистратурада ўқиш, анкета тўлдириш, мавзунгизни ва мақсадларингизни ёзиш, диплом, ўртача балл (GPA) ва тавсия хатларини тақдим этиш, – дейди Дилфуза Тожибаева.

Стипендия таълим ва яшаш харажатларининг катта қисмини қоплайди. Бироқ энг асосийси – у халқаро академик ва касбий тармоқларга йўл очади. МАГАТЭ таъкидлашича, дастурнинг мақсади фақат алоҳида стипендиатларни қўллаб-қувватлаш эмас, балки барқарор энергетик келажак учун зарур инсон капитали салоҳиятини ривожлантиришдир.

Ўзбекистонда АЭС қурилиши режалаштирилаётгани мамлакатга яқин йилларда ядро энергетикаси, хавфсизлик ва лойиҳа бошқаруви соҳаларида малакали мутахассислар керак бўлишини англатади. Шу нуқтаи назардан, МАГАТЭ стипендияси – шахсий ютуқдан ташқари, мамлакат келажагига қўшилаётган муҳим ҳисса ҳамдир.

                                                                                                          З.Тожиева