OpenAI ва Anthropic каби АҚШнинг сунъий интеллект гигантлари ўз ҳукмронлигини анча арзонроқ, бироқ сифати бўйича рақобатбардош Хитой моделларига бой бера бошлади. Харажатларни қисқартириш истаги АҚШ бизнес секторини глобал технологик харитани қайта шакллантиришга мажбур қилмоқда.

CNBC томонидан эълон қилинган тадқиқотга кўра, АҚШ компаниялари орасида Хитойнинг сунъий интеллект (AI) моделларидан фойдаланиш кўлами кескин ошган. Агар 2025 йилнинг биринчи ярмида бу кўрсаткич атиги 4,5 фоизни ташкил этган бўлса, йил сўнгигача ўртача 11 фоизга етди. 2026 йилнинг февралидан бошлаб эса АҚШ фирмалари ишлатадиган барча токенларнинг 30 фоиздан ортиғи Хитой моделлари орқали ўтмоқда, баъзи ҳафталик чўққиларда эса бу рақам 46 фоизгача кўтарилди.

Бундай кескин ўзгаришнинг сабаби оддий — иқтисодий самарадорлик. OpenRouter платформаси таҳлилчиси Жастин Саммервилнинг таъкидлашича, Хитойнинг очиқ кодли модел­лари АҚШнинг етакчи модел­ларига нисбатан 60 фоиздан 90 фоизгача арзонроқдир. Хитой моделларининг бозордаги ўрни шунчаки статистика эмас, балки реал бизнес натижалари билан тасдиқланмоқда.

Жумладан, Z.ai компаниясининг ушбу модели Vercel платформасида 2026 йилда энг тез тарқалган моделга айланди. Биринчи ҳафтанинг ўзида кунлик токен ҳажми 27 баробарга, фойдаланувчилар сони эса 80 баробарга ўсди.

Lindy номли AI стартапи ўзининг 100 фоиз трафигини Claude моделидан DeepSeek моделига кўчирди. Бу стратегия компанияга миллионлаб доллар маблағни тежаш имконини берди.

Гарчи АҚШ ва Хитой ўртасида технологик рақобат кучайиб бораётган бўлса-да, бизнес учун биринчи ўринда молиявий фойда ва операцион харажатларни оптималлаштириш турибди. Хитой моделларининг арзонлиги ва уларнинг тобора такомиллашиб бораётгани, АҚШ компанияларини анъанавий қиммат моделлардан воз кечишга ундамоқда.