Bugun Buyuk Britaniya tarixidagi muhim siyosiy jarayon amalga oshmoqda — «Breksit». Ammo xuddi shu bugun Qo‘shma Qirollik sog‘liqni saqlash milliy vazirligi muhimlik borasida bundan qolishmaydigan ma’lumotni ochiqladi: Xitoydan tarqagan koronavirus mamlakatdagi ikki kishida aniqlandi. Bu haqda BBC xabar berdi.

Kasallanganlar — bir oila a’zolari.

Hukumat kasallanganlar haqida tafsilotlarni va ularga qayerda yordam ko‘rsatilayotgani haqida xabar bermagan.

«Sog‘liqni saqlash milliy tizimi bunga juda yaxshi tayyorlangan va yuqumli kasalliklarga qarshi kurasha oladi», — dedi Angliya tibbiyot xizmati rahbari Kris Uitti. — Hozir infeksiya yanada tarqab ketishining oldini olish uchun bemorlar kimlar bilan aloqada bo‘lganini aniqlayapmiz».

Eslatib o‘tamiz, koronavirus oqibatida kamida 213 kishi vafot etdi — aksariyati Xitoyning Xubey provinsiyasiliklar; Xitoyda jami bu kasalga yo‘liqqanlar soni 10 ming nafarga yaqinlashdi. Yana 18 mamlakatda kasallikni yuqtirish bo‘yicha 89 ta holat aniqlandi.