AQSh prezidenti Donald Tramp G‘azo sektorida ijtimoiy ob’yektlarning butunlay vayron bo‘lgani haqida to‘xtalib, anklavning 1,5 million aholisini Misr va Iordaniya kabi davlatlarga vaqtinchalik ko‘chirib turish kerakligini aytgan.

Trampning so‘zlariga ko‘ra, G‘azo sektori tom ma’noda sahroga aylangan — deyarli hamma narsa vayron bo‘lgan. Shuning uchun u arab mamlakatlari bilan hamkorlik qilib, falastinliklarning tinch yashashi mumkin bo‘lgan boshqa joydan uy-joy qurishni afzal ko‘radi.

«Bu vaqtinchalik yoki uzoq muddatli yechim bo‘lishi mumkin», – deya qo‘shimcha qilgan u.

Tramp, shuningdek, bu borada Iordaniya qiroli Abdulla II bilan allaqachon gaplashganini, g‘azoliklarning bir qismini qabul qilishga ko‘ndirish uchun tez orada Misr prezidenti Abdulfattoh as-Sisi bilan ham bu masalani muhokama qilish niyatida ekanini aytgan.

O‘z navbatida, HAMAS harakati Trampning bu iddaolariga munosabat bildirib, uni «qabul qilib bo‘lmaydigan taklif» deb atagan.

«Biz bunday taklif va qarorlarni, garchi ular qayta qurish bahonasida yaxshi ko‘rinsa ham, qabul qilmaymiz», – deydi HAMAS vakili Bassem Naim.

Ma’lumot uchun, hozirda G‘azo sektorida 2,1 millionga yaqin aholi istiqomat qiladi.