O‘zbekiston Respublikasi axborot texnologiyalari va kommunikatsiyalarini rivojlantirish vaziri Azim Axmedxadjayev O‘zbekiston Prezidenti matbuot xizmatining «Kabinet» maxsus loyihasi doirasida videointervyu berdi.

Intervyuda vazirlik oldida turgan eng asosiy vazifalardan biri — magistral telekommunikatsiyalar tarmog‘ini kengaytirish, ichki internet-kanallar o‘tkazuvchanlik qobiliyatini oshirish haqida ham so‘z bordi.

Ushbu vazifalarni amalga oshirish uchun O‘zbekistonga xorijdan mutaxassislar jalb etilgan. Ayni paytda internet imkoniyatlarini kengaytirish ustida 20 nafardan ortiq xorijlik ekspertlar, shuningdek AKTning boshqa imkoniyatlarini rivojlantirish ustida 15 nafardan ziyod mutaxassislar ish olib bormoqda.

«Bu jamoa yuqori malakali mutaxassislardan iborat va ular telekommunikatsiyalar rivojlanishining zamonaviy trendlarini yaxshi bilishadi. Jahon tajribasidan kelib chiqib, biz alohida e’tibor qaratishimiz va ishlashimiz lozim bo‘lgan og‘riqli nuqtalarimizni ko‘rsatib turishadi», — dedi soha rahbari.

«Internet-kanalning o‘tkazuvchanlik qobiliyatini 160 gigabitdan minimum 1,2 terabitgacha oshirishni rejalashtiryapmiz. Aholi, sarmoyadorlar va tadbirkorlar O‘zbekiston IT-sohasi taqdim etayotgan imkoniyatlarni his qila olishlari uchun bu ishlarni 2018-yil oxiriga qadar yakuniga yetkazish ko‘zda tutilgan», — qayd etdi vazir.

Azim Axmedxadjayevning so‘zlariga ko‘ra, internet-kanalning kengaytirilishi katta hajmdagi axborotlarni yuklash tezligini oshiradi. Misol uchun, «YouTube»dagi videorolikning yuklanishini kutib o‘tirishga hojat qolmaydi. Shu bilan birga, biznes sohasida o‘zaro almashiladigan katta hajmli ma’lumotlarni uzatish tezligi oshadi.

Intervyuda elektron davlat xizmatlarini kengaytirish, dasturiy mahsulotlar eksporti, innovatsion startaplar, kovorking markazlari ishini yo‘lga qo‘yish, investitsiyalarni jalb etish,  kadrlar tayyorlash masalalari kabi soha oldida turgan qator muhim vazifalar haqida so‘z boradi.

Suhbatning to‘liq variantini ushbu havolada tomosha qilishingiz mumkin.