G‘azo sektorida sodir bo‘layotgan voqealar bolalarga qarshi urushdir. Bu haqda Birlashgan Millatlar Tashkilotining Bolalar jamg‘armasi (YuNISEF) matbuot kotibi Jeyms Elder ma’lum qildi.

G‘azo janubidagi Rafah shahrida faoliyat olib borgan Elder «Anadolu» muxbiri bilan suhbatda mintaqadagi so‘nggi vaziyat va guvohi bo‘lgan narsalar haqida gapirdi.

YuNISEF vakili 2023 yil 7 oktabrdagi hujumlardan keyin G‘azo sektoriga ikkinchi marta tashrif buyurganini ta’kidladi.

«Bu yerda juda chuqur umidsizlik bor. Odamlar juda charchagan, ularning ko‘plari ochlikdan o‘lmoqda. Rafahga harbiy hujum qilish (quruqlik hujumi) haqidagi aqldan ozgan g‘oya haqiqatga aylanishi mumkinligidan qo‘rquv hali ham bor», — dedi Elder.

Shuningdek, matbuot kotibi G‘azo sektori janubidagi Xon Yunus shahridagi Nosir kasalxonasiga borgani va uning ayanchli ahvoli haqida gapirdi.

«Asosan jarohatlangan bolalarga xizmat ko‘rsatgan juda muhim muassasa — Nosir kasalxonasi endi xizmat ko‘rsata olmaydi. Men boshqa ikki kasalxonaga bordim, ularning ikkalasi ham bemorlarga to‘lib toshgan», — dedi u.

Elderning so‘zlariga ko‘ra, shifoxona xodimlari doimiy ravishda dori-darmonlar tanqisligini qayd etishadi va YuNISEF, o‘z navbatida, tibbiy vositalarni yetkazib berishga muvaffaq bo‘ldi. Bundan juda ko‘p hajmdagi yordam G‘azo shimoliga yetkazilishi zarur, dedi u.

G‘azo sektoridagi 36 shifoxonaning 20 dan ortig‘i xizmat ko‘rsata olmayapti, dedi YuNISEF vakili.

«Menimcha (G‘azoda), albatta, bolalar eng ko‘p azob chekishdi. YuNISEF bu yerda sodir bo‘layotgan voqealarni «bolalarga qarshi urush» deb ataydi. Bu kabi barcha inqirozlar aholining eng zaif qatlamlari — bolalarga zarar yetkazadi. Odatda, yo‘qolgan bolalar taxminan 20 foizni tashkil qiladi, ammo G‘azo sektorida bu ko‘rsatkich 40 foizga yaqin. 10 mingdan ortiq bola halok bo‘ldi va bu raqam o‘sishda davom etmoqda. Vayronalar ostida yana qancha odam qolganini bilmaymiz. Bu bolalar uchun mutlaqo halokatli holat. Ko‘p bolalar ochlikni boshdan kechirmoqda; oziq-ovqat tanqisligi vaqt masalasidir», dedi Elder.

YuNISEF vakili G‘azo sektoridagi bolalar katta psixologik stressga duchor bo‘layotganini ta’kidladi. Va bu bolalarni davolashning yagona yo‘li «o‘t ochishni to‘xtatish»dir, dedi u.

«Otashkesimga erishilgunga qadar bolalar G‘azo sektoridagi jangovar zonada bo‘lishda davom etadilar. G‘azo bugungi kunda bolalar uchun joy emas, lekin bu yerda ularning soni 1 milliondan oshadi, o‘t ochishni to‘xtatishga erishish va bolalarga barcha zarur yordamni ko‘rsatish kerak», — dedi Elder.

Uning ta’kidlashicha, falastinliklar kuchli jamiyat bo‘lib, urush tugaganidan keyin xalqaro hamjamiyat ko‘magida o‘z kelajagini tiklay oladi.

«G‘azoda qilinadigan ishlar ko‘p bo‘ladi. Uylar va binolarning uchdan ikki qismi vayronaga aylangan. Bolalar boshdan kechirgan psixologik jarohat (urushdan keyingi davrda) hal qilinishi kerak bo‘lgan eng katta masala bo‘ladi», dedi u.

YuNISEF vakili G‘azoga yordam kelayotganini, ammo yetarli darajada emasligini qayd etdi.