Алпинист ҳамда миллионлаб обуначиларга эга блогер (Nimsdai) Нирмал Пуржа Покистондаги Қорақурум тоғининг Броуд-Пик чўққисига кўтарилиш пайти (баландлиги 8 051 метр) қор кўчкиси оқибатида ҳалок бўлди. Бу ҳақда у асос солган Elite Exped компанияси хабар берди.

Аввалроқ база лагеридаги манбаларга асосланиб, Geo TV телеканали қор кўчкисидан сўнг алоқа узилиб қолган 10 алпинистдан 8 нафарининг жасади топилгани ҳақида хабар берганди. Қолган икки алпинист ҳамон қидирилмоқда.

29 июл куни ўн нафарлик алпинистлар жамоаси Броуд-Пик чўққисига кўтарилишни бошлаган. Экспедицияга 43 ёшли Нирмал Пуржа бошчилик қилган. Жамоа таркибида беш нафар шерпа (непалликлар), америкалик, хитойлик ва ўмонлик алпинистлар ва покистонлик йўлбошловчи бўлган. 30 июл куни маҳаллий вақт билан куннинг ўрталарида тоғдан қор кўчган, шундан сўнг гуруҳ билан алоқа узилиб қолган. Қор кўчкиси 6 600 метр баландликдаги С2 ва С3 лагерлари орасини тўсиб қўйган. GPS-узаткичлардан олинган маълумотга кўра, кўчки спортчиларни бир километр пастга улоқтириб ташлаган.

Нирмал Пуржа 2019 йилда «Project Possible» лойиҳаси билан машҳурликка эришган. Ўшанда у 6 ой ва 6 кун ичида дунёнинг энг баланд 14 та чўққисини забт этганди. Унинг қаҳрамонлиги ҳақида Netflix компанияси «14 Peaks: Nothing Is Impossible» деб номланган филмни суратга олган.

Пуржа британ армиясидаги гуркхлар бригадаси ҳарбийси сифатида Буюк Британия Қироллик денгиз пиёдалари махсус бўлинмасида хизмат қилган. 2018 йилда хизматдан истеъфога чиққанидан сўнг алпинизм билан шуғулланиб келган.