Германия пайшанба кунидан бошлаб қочоқларни мамлакатга киритмайди ва чегараларида назоратни кучайтиради. Бу ҳақда мамлакат Ички ишлар вазирлигининг янги раҳбари Александр Добриндт маълум қилди.

Бу канцлер Фридрих Мерцнинг сайловолди кампаниясининг бир қисми эди.  Канцлер лавозимидаги биринчи кунида Мерц «ноқонуний киришга бўлган барча уринишларни истисносиз рад этиши»ни эълон қилди. Амалдаги паспортга эга бўлмаган ҳар бир кишига мамлакатга кириш тақиқи қўйилади. Бу хавфсиз Евроиттифоқи мамлакатлари орқали ҳаракатланаётган қочоқларга ҳам тегишли.

Чоршанба куни Александр Добриндт федерал полицияга чегара назоратини кучайтириш ва ноқонуний кириш ҳолатларида ҳужжатларни рад этиш бўйича оғзаки буйруқ берди. Бу Европа Иттифоқи давлатлари ва Швейцария орқали биринчи марта мамлакатга кириб келадиган қочоқларга тегишли.

2015 йилда Меркел давридаги низом федерал полиция ходимларига ноқонуний муҳожирлар бошпана сўрамоқчи бўлган тақдирда Германия чегарасини кесиб ўтишга рухсат беришни назарда тутган. Бу эса ўтган 9 йил давомида ноқонуний мухожирларнинг Германияга назоратсиз киришига сабаб бўлди. Назоратсиз, ноқонуний миграция Германияда жиноятчилик ва зўравонликнинг кучайиши каби хавфсизлик муаммоларини келтириб чиқарди.